Mizoram leh Assam CM-te'n inbiak an duh Inbiakna hmanga ramri buai chinfel kan remti - CM

2nd August, 2021

Chief minister Zoramthanga chuan, Mizoram leh Assam ramri buai chu inbiakna ṭha tak hmanga chinfel an remtih thu a sawi. Assam CM Himanta Biswa Sarma pawhin ramri buai chinfelna awmchhun chu inbiak a nih thu a sawi bawk.

CM Zoramthanga hian nimin khan Twitter kaltlangin Mizoram sorkar dinna a puang a; Union Home minister Amit Shah leh Himanta Biswa Sarma te nen phone-a an inbiak thu a tarlan hnuah, ṭha taka indàwra ramri buai chinfel theih a beisei thu a tarlang a ni.
Zoramthanga chuan, "Union Home Minister leh Assam Chief Minister-te nen telephone-in kan inbia a, Mizoram leh Assam ramri buaina chingfel turin awmze neia inbiak kan remti a ni," a ti. Social media lama fimkhur turin mipui a chah a, "Mizoram mipuite chu boruak tisosang thei thilte thehdarh lo tur leh, fimkhur taka social media hmang turin ka chah a ni," a ti.
July 26, 2021-a Vairengte dáia Mizoram police leh Assam police-te an inkah hnuah buaina chungchang hi social media-ah thehdarh a tam a, mimalin anmahni account-a an ngaihdan an ziah bakah, national media leh politician-te'n official social media-a thu an ziahah mipuiin an ngaihdan an tarlante hmuh tur ṭhahnem tak a awm.
CM Zoramthanga hian Kolasib DC-in district chhunga hnam dangte thlamuang taka awm tura a tihna leh an veivahnaah harsatna siam loh tur a nih thu te, harsatna tâwk an awma hriattirna tur thu a chhuahte chu Twitter-ah a dah a; hmarchhak state-te a inpumkhat zel tur thu a tarlang bawk.
Nimin vêk khan Assam Chief Minister-in Mizoram nena inremna kawng zawn a ṭul thu Twitter hmangin a puang a, "Kan duh ber chu India hmarchhak inunauna chawm nun zel a ni a, Assam leh Mizoram ramria thil thleng hi state pahnih tan pawha pawm theih loh thil a ni. Mizoram CM Zoramthanga'n a quarantine hun a hman zawhah min biak a tiam a, ramri buaina hi inbiakna hmang chauha chinfel theih a ni," a ti.
CM Zoramthanga hi July 24, 2021-a Shillong aṭanga a haw hnuah a zinpuite zingah Covid-19 vei hmuh chhuah a nih avangin a inkhung mek a ni.