July-ah hripui vei 18,433 hmuh a ni: Lockdown ni 103 chhungin 33,930 hmu

Mizoramah July 2021 chhung khan Covid-19 vei mi 18,433 hmuh chhuah a ni a, kumin April 20 aṭanga inkhuahkhirh leh inkhàrkhip kalpui chhungin hripui vei mi 33,930 a ni bawk.

Kumin July thla chhung khan Covid-19 laka fihlim tawh mi 10,198 chhuahtir an ni a; hripui vangin mi 51 an thi thung.

Kumin July thlaa hripui vei hmuh chhuah 18,433 hi chawhrualin ni tin mi 594 chuang hret hmuh chhuah awm ang a ni a; hmuh chhuah tlem ber ní, July 4-ah mi 88 hmuh chhuah a nih laiin, hmuh chhuah tam ber ní, July 25-ah mi 1,369 hmuh chhuah a ni thung.

Mi sang khat aia tam hmuh chhuah ṭum ni thum a awm a, chu'ngte chu ni 25 (1,369), ni 26 (1,118) leh ni 28 (1,100)-te a ni.

Kumin bikah chuan April 20 aṭangin Mizoramah inkhuahkhirh (lockdown) kalpui ṭan a ni a, inkhuahkhirh ṭan hma, April 19 thlengin Covid-19 positive 4,995 hmuh chhuah hman a ni. July 31 thlengin hripui vei 38,925 hmuh chhuah a ni tawh a, inkhuahkhirh ṭan ní, April 20 aṭanga July 31 thlengin, ni 103 chhungin Covid-19 vei 33,930 hmuh chhuah an awm tihna a ni.

Lockdown ni 103 chhunga Covid-19 positive mi 33,930 hmuh chhuah hi chawhrualin ni tin hmuh chhuah mi 329 chuang hret (329.42) an awm tling. Lockdown chhung bikah pawh hripui vei hmuh chhuah a pung tial tial tih a lang a; May thlaa mi 6,268, June thlaah mi 8,093 leh July thlaah mi 18,433 hmuh chhuah a ni.