Total lockdown pawhsei a ni
Aizawl Municipal Corporation (AMC) huam chhunga total lockdown kalpui mek chu August 7, 2021 thleng kalpui turin pawhsei leh a ni. Aizawl khawpui bikah kumin April 20 aṭangin inkhuahkhirhna (lockdown) kalpui ṭan a ni a, vawiin chhum lo chat loa kalpui ni 105-na a ni.
Aizawla total lockdown kalpui chu thupek hmasa ang chuan July 31 zanlaia tàwp tur a ni a; Mizoram sorkar chuan chawlhkar khat dang, August 7, 2021 thleng a pawtsei a, hei hi hman tluan a nih chuan ni 110 chhung inkhuahkhirh/inkhàrkhip kalpui a ni ang.
July 31, Inrinnia Health minister Dr R Lalthangliana hoa sorkar hotute leh pawl hruaitute Secretariat conference hall-a ṭhukhawm chuan, AMC huam chhunga total lockdown kalpui mek chu August 7 zanlai dar 12 thleng pawhsei an rél.
Inkaihhruaina, stan-dard operating procedure (SOP) chu State Executive Committee on State Disaster Management Authority tihchhuah tura an dah angin, July 31 zan khan tihchhuah nghal a ni.
August 1-7, 2021 chhung atana lockdown puan/pawhsei thupek chhuah hi kumin bikah a ṭum 15-na a ni.
Sorkar thuchhuah tarlan danin, sorkar hotute ṭhukhawm chuan, Mizoram dinhmun, a bikin Aizawl dinhmun thlirin, hripui léng inkài chhàwnnain a vàwrtàwp a thlen mek laia inthlahdul chu a rem rih loah an ngai a; swab sample endik rûnpui neih mek chu ngawrh taka kalpui zel ṭha an ti.
Sorkar laipuia Health ministry chuan, hripui vei hmuh chhuah zat (positivity rate) 10% aia a sànna district-ah khauh taka inkaihhruaina kalpui tur a ni tih an sawi thu an tarlang.
Mizoram sorkar chuan, Aizawla duty police zinga tam tak ramri lamah thawn an nih avangin total lockdown kalpui chhungin local task force leh YMA-te chu ngawrh taka duty chhunzawm turin a ngen a ni.
Ṭhutkhawm kaihruaitu Dr R Lalthangliana chuan, ICMR hotute hnenah RT-PCR test kit leh a bàwlhlote Mizorama pe leh tura a ngen thu a sawi a, "ICMR lamin RT-PCR Test kit 20,000 bakah, a bàwlhlo viral transport medium (VTM) leh RNA extraction kit 20,000 ve ve, a vaiin cheng vbc. 5 vel man a thlàwna an rawn pek tur thu an sawi a, kar leh (tun kar)-ah a rawn thlen hman beisei a ni," a ti.
Meeting-a tarlan danin, Rapid Antigen Test kit-ah thlaphànna tur a awm lo a, 1,00,000 thleng mai tur a awm bakah, 2,00,000 dang pawh order a ni tawh. RAT kit man a tlakhniam avangin, RAT hmanga swab sample endik man chu Rs. 100-ah tihhniam a ni dawn.
Inrinnia ṭhutkhawmah hian Covid-19 Medical Operation Team chairman Dr ZR Thiamsanga, MLA, Aizawl mayor Lalrinenga Sailo, chief secretary Lalnunmawia Chuaungo leh sorkar hotu dangte bakah, Medical Operational Team, IMA, Joint NGO, MKHC leh local task force aiawhte an tel a ni.