Sumdawngte'n lockdown an duh lo August 3 ral hmaa sût turin an ngen

Sumdawng páwl hrang hrang 70 chuang intêlkhawmna, Mizoram Business Coordination Committee (MBCC) chuan, total lockdown pawhsei chu an duh lo a, August 3, 2021 hmaa sût turin Mizoram sorkar an ngen. Vawiin aṭangin lungawi lohna lantir nan flag dum târ an tum bawk.

MBCC hian nimin khan ṭhutkhawm hmanhmawh neiin, Mizoram sorkarin Aizawl khawpuia total lockdown a pawtsei chu ṭha an tih loh thu leh an duh loh thu an tarlang a; lockdown pawhsei chu mirethei zawkte rahbehnaah an ngai a ni.

MBCC chuan, "Ni tin eichawp zawngte leh kut hnathawktute tana phurrit nasa thei tur ang bera ruahmanna siam niin a lang. Kum 2020 kum pumpui deuhthaw bakah kum 2021-ah ringawt pawh ni 109 ngawt mai khuahkhirhna a kalpui hi mipui leh rethei zawkte rahbehna leh ding khaw chhuak zo tawh lo tura awpbehna nia kan hriat avangin tuna total lockdown kalpui leh mek hi August 3, 2021 ral hma ngeia siamṭha turin Mizoram sorkar kan ngen a ni," an ti.

Mizoram Business Coordination Committee chuan, Mizoram sorkarin total lockdown a kalpui dan chu awmze mumal lo a nih thu tarlangin, "Sorkarin total lockdown hmanga mipui leh rethei zawkte min awpbeh chhung hi a rei tawh em avangin kan tlin tawh lo. Kan loan bá te, kan in luah man te, tui leh electric bill te, naupang online class kal avanga senso tam tak te, ni tin ei leh in turte nen kan tlin ta ngang lo," an ti.

MBCC member-te chu vawiin zing aṭangin an chenna in, hnathawhna leh eizawnna lirtheiahte puan dum zár vek turin an hriattir a; lockdown chu mi rethei leh harsa zawkte tawrhna leh rahbehna a nih avangin lungawi lohna lantira puan dum zar turin mipui an ngen bawk.

MBCC chuan, tun hnaia Vairengte daia Assam sorkar chêt dan an dem thu leh a do lêt tura Vairengte khawtlang leh Mizoram police-te chet dan chu chhuanawm an tih thu an sawi a; buaina nghawng kal zela Mizoram bungraw lut tur Assam mite'n kawngpui an dang chu an dem thu leh, Mizoram Governor kaltlangin Ministry of Home Affairs-ah Assam chet dan duh lohna an thlen tur thu an tarlang bawk a ni.