Assam mite lakah thubuai ziah luh a ni Assam CM laka FIR ennawn a ni ang - CS

July 26, 2021-a Vairengte dáia Mizoram police leh Assam police inkahna leh buaina thleng kaih­hnawihah Mizoram police-te chuan Assam chief minister Himanta Biswa Sarma leh Assam sorkar mi 200 chuangte lakah thubuai an ziak lut. Hetih lai hian, chief secretary Lalnunmawia Chuaungo chuan, Assam CM laka FIR thehluh chu an ennawn tur thu a sawi.

Thu dawn danin, Assam mite lakah hian Vairengte Police Station-ah thubuai ziah luh a ni a; Assam CM Himanta Biswa Sarma, IGP Anurag Aggarwal, DIG (Cachar) Devajyoti Mukherjee, Cachar DC Keerthi Jalli, SP Chandrakant Nimbalkar, DFO Sunnydeo Choudhury, Dholai PS-a officer-in-charge Sahab Uddin leh police mi 200 vel, an hming la hriat chian lohte lakah thubuai ziah luh a ni.

Thubuai ziah luha case no. chu 19/21 dt. 26th July, 2021 a ni a; thubuai ziah luhnaa dan tlawhchhan zingah -IPC Section 307, 120B, 270, 325, 326, 353, 366, 334, 448, 34 bakah, Arms Act leh Covid-19 Act-te a tel.

Hetih lai hian, chief secretary Lalnunmawia Chuaungo chuan, Assam CM laka FIR thehluh chu CM Zoramthanga bakah, amah pawhin an hriatpui loh thil a ni a, ennawn a nih tur thu a sawi.

Chief secretary Lalnunmawia chuan India Today-in an kawmnaah, "Assam CM laka FIR thehluh hi kan CM hriatpui loha tih a ni a, amah pawhin min be tawh a, kei pawhin ka hriatpui lo. CM rawt angin a buaipuitu officer-te ka bia ang a, kan ennawn ang. FIR buaipuitute kan sawipui ang a, dan aṭanga ennawn hnuah a ṭul chuan hnuh kîr a ni ang," a ti.

Assam CM chuan, a thubuai ngaihtuahnaah ṭha taka a tel tur thu sawiin, "Ka laka FIR an thehluh hian buaina a chinfel dawn chuan a lawmawm ka ti a, khawi police station-ah pawh ni se ṭha takin ka kal ang. Kan official-te erawh an chhui ka phal dawn lo," a ti a; thubuai chu Mizoram police ni lo, neutral agency-in chhui se a duh thu a sawi.

Mizoram police FIR-a a lan danin, July 26-a inkahnaah Mizoram mi pasarih an hliam a; Hav. Lalbuatsaiha, 5th IR chu a bán veilamah kah hliam a nih bakah, PC Lalmuansanga, Vairengte chu a malpuiah kah hliam a ni. Silchar lam aṭanga Mizoram pana haw John Vanlalzawna, Kanan Vengte nupa chu Assam mite'n kut an thlak rawn tih tarlan a ni bawk.

Assam police-te pawhin Mizoram sorkar official mi parukte chu Dholai PS-ah thubuai an lo siamsak tawh bawk a; chu'ngte chu - Kolasib DC Dr H Lalthlangliana, SP Vanlalfaka Ralte, Vairengte SDPO, Vairengte SDO leh Vairengte Police Station OC-te an ni. Rajya Sabha MP K Vanlalvena pawh a thusawi avangin thubuai an siamsak bawk.

Kolasib DC chuan, Assam police-te'n Mizoram sorkar official-te laka thubuai an ziah luh chu awmze nei lo a nih thu sawiin, FIR chu thil thlenna hmun huamtu PS-ah thehluh tur a ni a, thil thlenna chu Vairengte PS huam chhung a nih avangin Dholai PS-a thehluhin awmzia a neih loh thu a sawi.