Ramria MTP duty Myanmar lamin an tibuai Siasi-a duty turin Assam Rifles tirh an ni

March 15, Pathianni chhun dar 1 vel khan Siaha district-a Myanmar ramri dep Siasi khuaa Myanmar ram aṭanga Mizorama lut tur venga Mara Thyutlia Py (MTP) duty-te chu Myanmar lama Locheita khaw ṭhalaite'n an bei a, an inphêksual. Buaina chhuah hnuah police an thleng a, niminah Assam Rifles sipai an thleng leh bawk.

Thu dawn danin, Siasi khua hi India leh Myanmar inrina laia awm niin, Myanmar nena inkalpawh turin kaltlang a ngai a, a ràl lehlam km. 3 vel leka hláah Locheita khua a awm. Khawvela COVID-19 léng laka Mizoram a him theih nan Siaha DC ngenna angin Siasi khuaa MTP member-te chu Myanmar aṭanga luhnaah ram páwn aṭanga Mizorama luh tumte dang turin tun hnai aṭang khan an duty ṭhin.

Locheita khaw tlangval Mato Mahpaw nia hriat chuan Chakhei (Siaha district)-a a farnu pasal neia awm tlawh tumin Pathianni zing khan Mizoram chhungah luh a tum a, a hma ní, Inrinniah pawh Chakheiah chuan a kal tawh nghe nghe. Chakhei khuaa kal turin Chhimtuipui lui kân hnuah Siasi khua paltlang a ngai a; Pathianni zinga Chakheia kal leh a tum chu Siasi MTP duty-te'n an lo dang a, Mato Mahpaw chu an khaw lamah a lêt leh nghal a ni.

Pathianni chhun dar 1 velah Locheita khaw ṭhalai rual mi eng emaw zat chu Siasi khuaah kalin, Chimtuipui lui kama MTP duty-te chu an bei a, an inphêksual ta a ni. COVID-19 dona chungchanga DC aṭanga banner an dawn an tàrte pawh tihchhiat a ni a; Myanmar lam mite chuan an tam hneh avangin Siasi MTP member-te chu an che thei lo niin an sawi. Myanmar lam mite chuan Chhimtuipui lui kama an intihbuaina chu duhtâwk mai loin, Siasi khaw chhungah an lut a, buaina an siam chhunzawm a; Siasi V/C hruaitute an inrawlh hnuah buaina a reh zui a ni.

Buaina thlen thu hi Locheita khaw nu leh pate'n an hriat hnuah Siasi khuaah an kal a, inremna thu sawiin, hun eng emaw chen an inbiak hnuah an inrem thei ta niin an sawi. Buaina chhuak chungchang hi MTP Gen.Hqrs president PP Zalena'n Siaha Additional SP hnenah Pathianni khan a thlen nghal a; Siaha district hotute'n hma an la zui a ni.

Siasi khuaa MTP duty-te'n Vanglaini palai an hrilh danin, buaina chhuah hnuah police panga vel Siasi khuaah an kal a, mahse, an awm rei lo a, nimin lamah chuan an awm tawh lo. Nimin vêk khan Assam Rifles sipai 10 vel chu Siasi an thlen veleh an duty zui thung.

Buaina thleng an hriat veleh MTP Sub-Hqrs, Chakhei khuaa MTP member-te leh Siata khuaa MTP member eng emaw zat chu Chhimtuipui lui kama MTP duty-te pui turin  eng emaw zatin Pathianni tlai khan Siasi an thleng ve bawk.

Mizorama international border-te chu sipaite'n an veng ṭhin a; Myanmar nena inrìna zawng chu Assam Rifles chan a ni a, Bangladesh nena inrina zawng chu Border Security Force (BSF) chan a ni thung.