Covid-19 vanga thi 140 an tling tawh

July 31, Inrinni leh nimin khan Mizoramah Covid-19 vanga thi mi paruk an awm a, July 30, Zirtawpni tlaia thi mi pakhat chu a thih hnuah Covid-19 positive a ni tih hmuh chhuah a ni bawk. Nimin tlai dar 5 thleng khan hripui vangin mi 140 an thi tawh.

July 30, 2021 tlai dar 5:46 khan Thangkhumi (94) m/o Lalramthara, Bethlehem Veng chu an inah a thi a, nimin chawhma dar 10 khan an inah vui a ni. Thangkhumi hi an chhungkuaa inkhung lai an ni a, a thih hnuah RAT hmanga a sample endiknaah Covid-19 vei a ni tih finfiah a ni.

July 31, Inrinni zing khawvar hma, dar 1:15 khan Zionthanga (75) h/o Lalrinpuii, Khatla East chu Covid-19 vangin State Referral Hospital-ah a thi a, chhun dar 11-ah vui a ni. Covid-19 positive a ni tih July 29, 2021-a hmuh chhuah a ni a, SRH-ah dah luh nghal a nih thu sorkar thuchhuakin a tarlang.

Rev. Lalṭanliana (70) h/o Lalramliani, Rengtekawn, Kolasib chu Inrinni zing dar 7:30 khan hripui vangin SRH-ah a thi a, tlaiah vui a ni. Amah hi Evangelical Free Church of India (EFCI) kohhrana pastor pension tawh niin, natna dang nei sa a ni a; kumin July 15 khan Covid-19 positive a ni tih hmuh chhuah niin, SRH-ah admit nghal a ni.

Inrinni chawhma dar 10 khan Neihkimi (75) m/o Lalremruati, Ramthar Veng, Aizawl chu hripui vangin SRH-ah a thi. A thih hma July 30-ah Covid-19 positive a ni tih hmuh chhuah a ni a, SRH-ah enkawl nghal a ni. Ama duh dan angin a ruang chu a fanu, Armed Veng South-a miin a la a, Armed Veng South thlanmuala vui a ni. Cancer nei sa a nih bakah, BP hniam a nih thu Armed Veng South YMA hruaitute'n an sawi.

July 31 vek chhun dar 12:30 khan C Lalkima (96) h/o Lalthianghlimi, Venghlui chu Covid-19 vangin SRH-ah a thi a, tlai dar 4:30 khan Venghlui Presbyrterian Kohhran Hall-ah vui a ni. Covid-19 vei a ni tih July 21-ah hmuh chhuah a ni a, July 24 khan SRH-ah dah luh a nih thu sorkar thuchhuakin a tarlang.

Covid-19 vei SRH-a enkawl lai Lalthianghlima (60) w/o Lalhmingliana, Lawngtlai Chandmary chu vawiin nimin zing dar 5 khan Lawngtlai District Hospital-ah a thi a, nimin khan vui a ni. Covid-19 positive a ni tih July 22 khan hmuh chhuah a ni a, Lawngtlai District Hospital (dedicated covid health centre)-ah enkawl a ni.

Nimin vek zing dar 7:30 khan Vanlalawmpuii (17) d/o Zoremsiama, Electric Veng, Aizawl chu SRH-ah a thi a, nimin chhun khan Electric Veng YMA Hall-ah vui a ni. Amah hi Covid-19 vei a ni tih July 23 khan hmuh chhuah a ni a, SRH-ah dah luh nghal a ni. Ngawr (TB) vei sa a nih thu Electric Veng khawtlang hruaitute chuan an sawi.