CYMA-in MP thlavâng an hauh

Central YMA chuan thuchhuah siamin, July 26, 2021-a Vairengte dáia Mizoram police leh Assam police inkah chungchanga Rajya Sabha MP K Vanlalvena thusawi chu thlamuanthlak an tih thu an tarlang.

July 31, Inrinnia CYMA thuchhuah chuan, "Mizoram MP Pu K Vanlalvena’n huaisen taka ram leh hnam chhanna tura a ṭawng chhuak hi YMA chuan lawmawm kan tiin, a thlamuanthlak kan ti. Kan ram leh hnam tana theihtawp chhuaha huaisen taka ke pên zel turin duhsakna kan hlan a ni," an ti.

CYMA chuan, a thusawi avanga K Vanlalvena'n vauna a tâwk leh Assam sorkarin man tuma New Delhi-a police hotute a tír chu an dem thu sawiin, Assam sorkar chu Mizoram MP chunga an hmalakna zawng zawng hnûkkîr vek turin an ngen a, "Kan MP chungah eng pawh thleng se la, YMA chu theihtawpin a thlavâng hauh tur leh a ṭul anga hma la turin a inhuam reng a ni," an ti bawk.