Tripura aṭangin mamawh lak luh a ni

Assam lamah kawngpui an dan avanga Mizoram sorkarin Tripura aṭanga mamawhte la tura ruahman a siam angin, tuialhthei phur tur a tirh tanker zinga Aizawl thleng hmasa pahnih chuan July 31, Inrinni tlai dar 6:20 khan Aizawla MIZOFED Petrol Pump an thleng a; FCSCA director Ramdinliani leh MIZOFED chairman K Laldawngliana ten an lo hmuak.

Supply director Ramdinliani sawi danin, Tripura kaltlanga Mizoram mamawhte lak luh dan tur ruahmanna chu hun eng emaw chen aṭangin buaipui a ni tawh a; Indian Oil Corporation hotute nena an indawr hnuah kumin July 8-9 khan FCSCA department hotute chuan Aizawl-Tripura kawng an endik a ni.

Tripura lam aṭanga tuialhthei lak luhte chu Dharmanagar Oil Depot-a mi a ni a, eirawngbawlna gas pawh Bishalgarh Bottling Plant, Tripura aṭangin lak mek a ni bawk. MIZOFED bik hian tuialhthei phur tur tanker pariat leh LPG phur tur truck pahnih an tír phawt a; private truck 13 chu Mizoram panin kawngah an thang mek bakah, truck eng emaw zat an chhuk tawh bawk.

FCSFA Director chuan, Tripura aṭanga tuialhthei lak luhnaah value added tax chawi a ngaih avangin, petrol leh diesel man chu Re 1 velin a to belh dawn tih a sawi. Assam-ah rél kawng tihchhiat a nih avangin Bairabi chawlhhmunah buhfai phurh luh theih a la ni lo tih sawiin, "FCI-te nena indawrin, Dharmanagar FCI kudam aṭangin buhfai phur lut tura ruahmahnna siam a ni," a ti.

Nikum October thlaa ramria harsatna thlen hnuah Mizoram PWD chuan Tripura panna kawng, Zamuang-Bairabi kawngpui a thawm ṭha a, Teirei leh Langkaih leite pawh metric ton 20 dâwl zo tura tihchak a ni.