Aizawla khawsak harsa zual Ṭanpuina tur sum sem a ni

Aizawl khawpuia inkhàrkhip vanga khawsak harsa zuala ngaihte Chief Minister’s Relief Fund for Covid-19 aṭanga chhawmdawlna pek chu July 31, Inrinni khan Aizawl DC Dr Lalhriatzuali Ralte-in a sem chhuak.

Chhawmdawlna sum hi Aizawl Municipal Corporation (AMC) huam chhunga chhungkaw 9,750 hnena pek tur a ni a, chhungkaw pakhatah Rs. 1,500 zel pek tura ruahman a ni. Aizawl chu hlawm (zone) 10-ah ṭhen a ni a, zone tin enkawltu incident commander-te'n an biala local task force ṭheuha an sem turin Bawrhsap chuan incident commander-te hnenah a hlàn a ni.

Incident commander-te chuan an huam chhunga LTF hruaitute hnenah an sem nghal a; LTF-te'n an veng chhungah an sem ve leh ang.