Assam police kohnaah MP Vanlalvena a kal lo

Assam police-te'n Mizoram Rajya Sabha MP K Vanlalvena laka thubuai an ziah luhah, Dholai Police Station-a inlan tura an koh hun chu nimin (August 1) kha a ni a, MP hi a inlan lo.

Assam police hmaa a inlan loh chhan Vanglaini zawhna chhângin K Vanlalvena chuan, a kal nachhan tur a hriat loh thu a sawi a, "An duh duha min koh tur leh an duhnaa kal tur ka ni lo," a ti a; tunlaiin Parliament session a awm mek avangin hmun danga kal thei a nih loh bawk thu a sawi.

Zawhna chhangin Rajya Sabha MP chuan, a chenna (quarters)-ah a awm loh hlânin Assam police-te SP hoa an kal nia a hriat thu a sawi a, "Ka awm loh avangin kawngkharah lehkha an lo târ niin an sawi a, an lehkha târ hi ka hmu ve lo a, social media velah ka hmu ve chauh a ni," a ti.

K Vanlalvena chuan, a quarters-a an kal hnuah Assam police-te chu Mizoram House-ah an kal leh thu a sawi bawk.