KHAWTHLIR

Hliam zai nawn
July 26, 2021-a Vairengte dáia inkahnaa Assam police-te'n an kah hliam PC Lalmuansanga (20), Vairengte chu July 30, 2021 khan a malpui zai nawn leh a ni. Silai mûin a malpuia thisen zám a tihchhiat chu siamṭhat a ni a, silai mu táng lak chhuah nghal a ni. PC Lalmuansanga hi inkahna thlen zan khan Kolasib District Hospital-ah zai a lo ni tawh a, July 27 khan Aizawl Civil Hospital-ah sawn a ni a; thisen unit riat pek a ni tawh.

Endik chhunzawm
July 30, Zirtawpni khan Aizawla veng paliah swab sample endik rûnpui chhunzawm a ni a, sample 2,301 endik aṭangin hripui vei 69 (2.99%) hmuh a ni. Zuangtuiah sample 276 aṭangin mi 25 (9.05%), Hunthar Vengah sample 1,222 aṭangin mi 13 (1.06%), Edenthar Vengah sample 656 aṭangin mi 30 (4.57%) leh Muthi-ah sample 147 aṭangin mi pakhat (0.68%) hmuh a ni.

Puak thei man lo
Champhaiah puak thei thil tam tak Assam Rifles-in an man anga media-a tarlan chu thu dik lo a nih thu Champhai SP Lalrinpuia Varte chuan sawiin, "June 21, 2021-a puak thei thil mante chu thubuai chhui zawh tawh, chargesheet pawh Court-a thehluh a ni tawh," a ti a; NIA kuta thubuai hlan chhâwn a awm an hriat loh thu a sawi bawk.

Satellite-in ramri ziak dawn
Sorkar laipui chuan hmarchhaka state hrang hrang ramri buai chu satellite thlalak (imaging) hmanga chinfel a nih tur thu nimin khan an puang a, North Eastern Space Application Centre (NESAC) in an kalpui ang. NESAC hi Department of Space leh North Eastern Council ṭangkawpin an enkawl a ni.

MHIP-in dem
MHIP Gen.Hqrs chuan Silchar aṭanga Mizoram pana haw Vanlalzawna leh a nupui Lalsangpuii te Assam mite'n kut an thlak leh hmeichhia pawh an zuah lo chu an dem thu an chhuah.

Minister-in tanpui
Minister Lalruatkima chuan nimin khan a bial Aizawl West-II huam chhunga veng hrang hrang a tlawh a; LTF tin hnenah Rs. 1,00,000 ṭheuh a hlan.