Health Minister-in Referral Hospital-a COVID-19 laka inbuatsaihna a enfiah

Health minister Dr R Lalthangliana chuan March 15, Pathianni khan State Referral Hospital / Zoram Medical College (ZMC) a tlawh a, Coronavirus (COVID-19) vei an awm palha enkawlna tur leh inbuatsaih dante a enfiah.

Minister hian Coronavirus vei nia rinhlelhte dah hranna tur te, khawl bunna tur hmunhmá te, helicopter hman a ngaih huna a ṭumna hmun tur te, ICU, MRI room leh CT scan hmunte a enfiah a ni.

Mizoramah CO­VID-19 a thlen palha lo inrálrin nan ZMC-ah hian DRTB Isolation Ward-ah khum 30 ruahman a ni a; enkawl dam tawh, in lama haw la phal si lohte tan khum pasarih dah a ni bawk. Pindante chu hri a darh zel lohna tura ruahman a ni a, khuh leh thawhah enkawlna turin ventilator pawh rua­hman a nih bakah, doctor leh nurse luh/chhuahna tur leh damlote luh/chhuahna tur a hrana siam a ni. Rinhlelhte chu ni 15 chhung enkawlna tur bik­ah dah hran an ni dawn a, ei leh in chu sorkarin a thlawnin a tum ang.

Dr R Lalthangliana chuan, COVID-19 lakah rálkhèl dár an vua tih sawiin, "Pathianniah pawh kan hmalakna chhunzawm zel a ngai ta a ni. Hetiang hripui hi Mizoramin tawng ve thut thei kan nih avang­in ṭul leh mamawh awm angte chu kan inbuatsaih lâwk a ngai a, kohhran leh NGO hrang hrangte leh sorkar kan thawhhonaah kan ṭangrual ṭha a, a lawm­awm tak zet a ni," a ti.

COVID-19 State Level Task Force secretary Dr Pachuau Lalmalsawma chuan, "Kan inbuatsaih dan a ṭha hle a, thawktu lian ber aṭanga tê ber thlengin, driver-te pawh chî-âi lo turin kan inhrilh hneh hle. A lo thleng palh a nih pawhin tumah chiaiin kan buai phílí lo ang," tiin a sawi.

Health Minister-in State Referral Hospital a tlawh chungchangah hian MNF party chuan thu­chhuah an siam a; CO­VID-19 endikna kháwl chu cheng nuai 100 vel man a nih thu tarlangin, "He mi chungchang hi Finance minister ni bawk Chief Minister hoa meeting-naah a ṭul ang chu tih a ni ang, tih a nih avangin thil harsa lo tura ngaih a ni," an ti.