Theihtawp an chhuah tih hriatpui turin Kolasib MJA-in rawn hawte an ngen

MJA Kolasib district chuan, Kolasib district chu Assam ramri depa awm a nih avang­in state páwn aṭanga Mizo rawn hawte buaipui kawngah district-a sorkar official leh task force-te an hah hle tih an tarlang a; tangkhang rawn haw buaipuitu zawng zawngte'n theihtawp an chhuah tih hriatpui tur leh Mizo hnam zia vawn nun tum tlat turin state páwn aṭanga hawte an ngen.

Kolasib district MJA chuan, state danga Mizo awmte zinga a tam zawk chu mi chhuanawm tak tak, hnam dang karah pawh Mizo nih tinuamtu an ni tih an hriat thu sawiin, "Kan chhuang tak zet che u. Thiamna a pawimawh tluk zetin mahni hnamzia leh nunphung kalsan khawpin kan degree sang lo se, mahni hnam zia leh tih dan ṭha tlànsan zawnga thiamna hi a khingbai a ni tih hriaa vawng reng turin kan chah duh che u a ni," an ti.

Coronavirus léng mek a darh zel lohna tur leh Mizoram a him theihna turin sorkar ruahmanna angin district tinah theihtawp chhuaha hmalak a nih thu sawiin MJA chuan, "Task force, Police, Health department-te nen, hri léng do tura Mizo mipui ṭan rualna a ropui tak zet a ni," an ti a; Kolasib district chu ramri depa awm a nih avangin Mizoram a him theihna turin thawktu hrang hrangin theihtawp an chhuah chu chhuanawm an tih thu an sawi.

Kolasib MJA chuan, state pawna Mizo tangkhang hruai hawte lo dawngsawngtu hrang hrangte an hah hle tih sawiin, "Natna hri léng mek kai palh mai theih dinhmuna ding chunga hah sawi hlei thei lo leh mut hunbi leh chaw ei hunbi pawh nei hlei thei loa kan unau lo hawte tana ni sá leh ruahpui hnuaiah pawh in inpekna hi lawmawm kan ti a, hmél hlim tak nen mikhual in lo dawnsawn danah hian state páwna kan unaute tan pawh a thlamuan thlak hle ang tih kan ring," an ti.

Thawktute'n theihtawp an chhuah chungin, rîkrum thil a nih avangin inbuatsaihna felfai neih a har hle tih sawiin MJA chuan, "Tihsual leh chêt fuh tâwk loh ṭum te, beng tithlep zawngte pawh a awm ngei ang," an ti a; duhthusam lo a awm palh a nih pawhin, haidersak a, mawhphurtute'n an tan theihtawp an chhuah a ni tih hriatsak turin Mizoram mipui, a bikin state páwn aṭanga Co­vid-19 vanga hawte an ngen.

Kolasib district MJA chuan, Mizo zingah Covid-19 vei an awm chu pawi an tih thu sawiin, hripui vei mekte chu an dam thuai theih nan duhsakna an hlàn a ni.