COVID-19 hri léng chungchanga sorkar hmalakna Congress-in an duhkhawp lo

Mizoram Pradesh Congress Committee (MPCC) chuan thuchhuah siamin, Coronavirus (COVID-19) invenna leh natnain Mizoram a thlen palha inenkawlna tura Mizoram sorkar inbuatsaih dan leh hmalakna chu an duhkhawp loh thu leh, Mizoram sorkarin tun thlenga enfiahna kháwl a la nei lo chu mak an tih thu an tarlang.

MPCC chuan, Coronavirus chungchanga Mizoram sorkar hmalakna an thlir reng tih sawiin, hri léng laka Mizoram a him theihna tura kohhran ṭawngṭaina chu lawmawm an ti a, Pathianin a chhàn ngei an rin tlat thu an sawi a, "He natna do tur hian ram pum huapa ṭan rual a ngaihzia hriain politics inbeihna atana hman kan duh lo a, sorkar hmalakna thlawp tura kan inrin reng thu pawh kan lo chhuah tawh. Amaherawhchu, COVID-19 laka invenna tur leh Mizoram a thlen palha inenkawlna tura Mizoram sorkar hmalaknate hi kan duhkhawp lo tak zet a ni," an ti.

Congress party chuan, Vairengteah endikna hmun pakhat chauh sorkarin a siam vanga zin veivâkte'n harsatna nasa tak an tâwk nia sawiin, pawi an tih thu leh sorkar ruahmanna a felfai tâwk lohzia a chiang hlea an ngaih thu an sawi a, "Enfiah kan tum mek laiin March 13 aṭangin endikna siam belh a, thawktu dah belh a tum tih kan hria a, kan lawm hman hle," an ti a; mahse, Vairengtea endikna hmun siam belhah dentist pakhat leh AYUSH doctor pakhat hoin Thingdawla Nursing School-a nurse zirlaite duty tir an nih thu an sawi.

MPCC chuan, Mizoram sorkar chu Vairengteah hmanraw ṭha zawk, medicine doctor leh nurse puitling a rang thei ang bera dah turin an phût a ni. Health department-in helpline number an daha miin rinhlelh report an pek, sorkar official-in a lo chhan dan social media-a darh chu pawi an tih thu leh zahpuiawm an tih thu MPCC chuan an tarlang a, "Health department berin an ngai pawimawh lo lutuk kha a pawi kan ti a, rang taka an insiamṭhat nghal kan duh tak zet a ni," an ti.

Congress party chuan, India hmarchhaka state tam zawkin COVID-19 enfiahna kháwl an neih tawh laia Mizoram sorkarin tun thlenga a la nei ve lo chu mak an tih thu sawiin, "Mizoram sorkar hian he thil hi a ngaihven har lutuk deuh ni-ah kan ngai," an ti. Mizoram sorkar hmalaknate chu a ṭhat tâwk phawt chuan theihtawpa thlâwp an inhuam thu leh, nawr kal chawp reng an ngaih erawh chuan nawr tura an inrin thu an tarlang.

MPCC chuan, COVID-19 vanga Siaha district chhunga Myanmar nena inrinaah police duty tir loa Mara tlawmngai pawl MTP duty tir an ni leh, Myanmar lam mite nen intithiam loa insual buaina a thlen phah chu an dem thu sawiin, "Sorkar nêp vang, sorkarin a tih tur a tih tur a tih loh vangah kan ngai," an ti bawk.