MZP-in tun aia ramri ngaihven turin Mizoram sorkar an phût tih an puang

MZP hruaitute chuan nimin khan Aizawl Press Club-ah thuthar thehdarhtute an kâwm a; Mizoramin a ram chin a chàn belh zel loh nan hma lak chhunzawm an tum thu an sawi a, sorkar thuneitute chu ram venhimna kawngah chak zawka hma la a, tun aia ramri ngaihven turin an phût.

MZP president B Vanlaltana chuan, ramri chinfel a nih a, ramriah buaina a awm fo lohna turin Zophai bul Baibawn tlangah police outpost dah thuai turin sorkar an ngen nawn leh tih sawiin, "Sorkar­in chak zawka hma a la lo emaw, Assam lamin Mosolman biak-in an sa chhunzawm zel a nih a, Zophai area-ah Mizote tan harsatna an siam a nih chuan Zofate Chawlhbuk sa chhunzawm turin kan thawk chhuak nghal dawn," a ti.

Mizo pi leh pute luah chin ram humhalh a nih theih nan MZP-in nasa taka hma an lak ṭhin thu sawiin Vanlaltana chuan, ram humhalh nana Bairabi Zophaia Zofate Chawlhbûk sak tum a nih tirh aṭanga kawng hrang hranga kan hmalakna leh sorkarin hmalak tuma a insawinate chu a tak ram chang tawh se tih chu MZP duh dan a nih thu a sawi.

MZP President chuan, ramri chungchanga sorkarin a din Core Committee-in MZP-te ramri chungchangah document pawimawh zir chiang tura a tih angin an zir chianna sorkarah an thehluh tawh thu a sawi a, "Heti chunga vawiin thlenga hmalakna lawmawm hriat tur a awm zui lo hi hriatthiam harsa kan ti. Core Commitee hi a hming chauha a din leh hmala tak tak tur ni si lo, inphenna atan chauha a dinah kan ngai tawh," a ti.

MZP hruaitute chuan, Zophai ­area-a Mosolman biak-in sak hun rei tak chawlhsan tawh tun hnaiah hma thar lak a ni leh ta mai chu hriatthiam har an tih thu sawiin, "Hma thar an la ngei a ni tih hriat a nih avang leh slab chhûn tuma a dona tur an lo siam thar chu ṭha kan ti lo a, a hmunah kalin ṭhiahsak a ni," an ti a; biak-in hi sak chhunzawm a nih chuan chawlhbûk sa tura an thawh chhuah nghal tur thu an sawi.