ZPM MLA-te'n an fund mipui tan an hmang zel dawn - ZPM SG

Congress party hotute'n an mite ui behna atan 'ZPM-a luh kher a ngai lo e, VC/LC inthlan lo awm turah hian khaw tam thei ang ber­ah ZPM nen kan thawkho ang a, AMC inthlanah kan thawkho leh dawn a, kum 2023 MLA inthlanah pawh kan thawkho leh dawn tho alawm' tiin an sawi ṭhin nia sawiin Sapdanga chuan, "Hetiang thu hi a darh chak viau a ni awm e," a ti a; Congress thu thehdarh avangin VC inthlan awm turah an mal din dawn tih puan a ngaih thu a sawi.

ZPM Secretary General chuan, MNF kaihhruai sorkarin flagship programme a nei em tih zawh thut ni se, a ṭhenin 'nei' an ti ang a, a ṭhenin 'nei chiah lo' tia an chhàn tur thu sawiin, "Ṭhenkhatin SEDP an ti ang a, ṭhenkhatin mau an ti ang. SEDP hi a ni lo'm ni hotupain 'Khawnpui' a tih kha, han ti ila, 'Khawnpuia thingfâk ṭha ṭha kha Sports leh Tourism lamin an tuah zo zel,' ti pawl an awm ang," a ti.

Khawh chur chur khan a khawh ṭhelh a, khurpuiah lut loin a sirah a luang liam zur zur a ni mai thei tih sawiin K Sapdanga chuan, "Khaw­vel tirálkheltu COVID-19 hripui laka invenna hmanrua leina tur sum pawh kan nei lo. Mipui zirtirna tur publicity fund pawh department-in a nei mumal lo," a ti a; chutih laiin, Mizoram páwna phuahchawp kût huaihawt nana cheng nuai za tél an hman ral thu a sawi.