Covid-19 vanga SRH-ZMC-a thi Mi 125 zingah 108-in vaccine la lo

State Referral Hospital / Zoram Medical College chhinchhiah danin, July 29 thleng khan SRH-ah Covid-19 vei enkawl lai mi 125 an thi a, chu'ng zinga mi 108 chu Covid laka invenna damdawi (vaccine) la la lo an ni. Chutih laiin, mi 17 chu vaccine la tawh an ni thung. Hetih lai hian, vaccine la kim tawh mi pahnih July 29 hnua thi an awm bawk.

Covid-19 vaccine la tawh, hripui vanga SRH-a thi mi 17 zinga paruk chu la kim tawh (dose 2 la tawh) an ni a, mi 11 chu first dose chiah la an ni thung. Doctor-te chuan, hripui vei ICU-a enkawl ngai zingah Covid vaccine la kim tawh, dam taka chhuak leh ta eng emaw zat an awm thu an sawi.

SRH-ZMC hotute'n Vanglaini an hrilh danin, July 29, 2021 thlenga SRH-a hripui vei thi mi 125 zingah natna nei sa an tam ber a; cancer, kal (kidney) ṭha lo, thisen sang, zunthlum, kal thlak tawh, lung (heart) lam natna, chuap ṭha lo, depression, ashma, rit lutuk leh thau chhia nei tamte chu a tlángláwn a ni.

Natna nei sate tan Covid-19 chu a hlauhawm zual tih sawiin doctor-te chuan, "Kan admit tirha thau chhe ngah, thau lutuk leh rit lutukte an ngaihtuahawm zual ṭhin. Natna benvawn nei sa leh hetiang mite hian vei lo se kan duh rualin, second wave-ah hian an kai ta nual a, taksa chak ṭha chu kan chán mang lo," an ti. Thi zinga la upa vak lo, kum 30-40 inkarte chu natna benvawn sawi tur awm lo mah se, thau chhia leh lung ṭha lo nei, la hmuh chhuah si loh an ni thei tih an sawi.

SRH-ZMC doctor-te chuan, Covid vaccine la tawh zinga thi an awm leh zauh ṭhin chhan chu an taksaa natna hrik dotu a chak tâwk loh vang a nih ṭhin thu an sawi a, "Miin Covid a vei chuan, an taksaa natna do theitu (immune system) chu Covid hrik nen an insual ta a, chu chuan chuapah natna Covid Pneumonia a siam thar phah a, hei hi thihpui ve theih a ni," a ti.

Covid-19 vanga damlo zingah vaccine la kim tawh mi paruk chu ICU-a awm ngai khawpa ná ni mah se, an dinhmun a ṭhat avangin ICU aṭanga sawn chhuah an ni. Chutih rualin, ICU aṭanga sawn chhuah tawh zinga mi pahnih chu July 29 hnuah an thi leh tawh thung a; chu'ngte chu Lalṭanliana (70), Rengtekawn (thaw-hah nei) leh Mangi (41), Chawlhhmun (zunthlum nei)-te an ni.

Doctor-te chuan, Covid-19 avanga admit zingah upa tak tak pawh ni se, vaccine la ṭha an nih chuan, natna benvawnin na taka a tlakbuak sa a nih loh chuan dam chhuak leh eng emaw zat an awm tih an sawi.

Hetih lai hian, vaccine la kim tawh mi paruk dang chu hripui vangin an thi thung a, chu'ng mite chu natna benvawn dang nei sa vek - kal thlak tawh, lung natna leh natna khirh dang nei sa an nih hlawm thu doctor-te chuan Vanglaini palai an hrilh. Kum 58 chung lam vek an nih bakah, an zinga pali chu kum 70 chuang an ni.

July 29 thleng khan Covid vaccine dose khatna la tawh hripui vanga thi mi 11 an awm. Mi 11-te chu kum 70 chung lam panga, kum 60 chung lam pahnih, kum 40 chung lam pathum leh kum 40 hnuai ma (kum 37) pakhatte an ni. Natna benvawn nei mi pakua an awm a, pakhat chu natna dang a neih hriat a ni lo a, pakhat dang chu tarlan a ni lo.

Covid vaccine la kim tawh thite
1. Thangluaia (65), Kanan Veng Rílpui cancer, chuapa darh tawh
2. Dr Laltinchhawna (58), Zarkawt Liver transplant (thin thlâk tawh)
3. Lalhuamliana (85), Saron Veng Thisen sâng
4. Lalchhuanthangi (88), Laipuitlang Khum beta awm rei, depression nei
5. K Lianthangi (75), Ramhlun North Thisen sáng & zunthlum
6. C Chawngbuanga (74), Venghlui Thisen sáng, Zunthlum, lung ṭha lo, chuap ṭha lo.

Vaccine first dose la tawh thite
1. PC Zoramsangliana (65), Kanan Veng Renal transplant (kal thlak)
2. Lalthlamuanzuala (47), Armed Veng South
3. J Ngurchhawna (83), Phullen Thisen sang, stroke & pang khing zeng
4. Lalhmingmawii Pachuau (54), Venghlui Thisen sang
5. TC Lalzamlova (66), Electric Veng Thisen sang
6. Ngurliantluangi (72), Armed Veng South Thisen sang
7. PC Thangpuia (80), Chawngte Puma báwk awm, ngháwnga báwk, cancer ṭai darh
8. J Ramthangi (71), College Veng Zunthlum & thisen sang
9. Lalbeiseia (71), Vairengte Chuap ṭha lo
10. J Lalramliana (44), Bawngkawn Chaw kawng cancer, chuap TB
11. Ebenezer-a (37), Vaitin Natna dang a neih hriat loh