Khawzawl DC-in duty-te a tlawh kual

Khawzawl DC Zothanmawia chuan August 1, Pathianni khan Khawzawl khawpuia Covid-19 executive duty-te a tlawh kual. Khawzawl district-ah hian Covid-19 positive enkawl lai mi pahnih awm mek a ni.

Zothanmawia chuan, Khawzawl district-ah enkawl zawh loh khawpa tam Covid-19 vei an la awm lo chu lawmawm a tih thu a sawi a; tha thlah loa ṭhahnemngai taka duty turin executive duty-te a chah.

Khawzawl district-ah hian Covid-19 vei mi 108 hmuh chhuah a ni tawh a, an zinga mi 106 chu dam taka an chhuah tawh laiin, mi pahnih enkawl mek an ni. State páwn aṭanga haw inkhung lai mi 39 an awm mek bawk.

Khawzawl khawpuiah hian April 21, 2021 aṭangin Covid-19 executive duty ṭan a ni a, khawpui chhunga veng paruk - Arro Veng, Zaingen Veng, Zuchhip, Kàwnzàr, Vengthar leh Hermon Vengahte duty post pakhat ṭheuh siam a ni.