Chief Minister-in Bilkhawthlir a tlawh

Chief minister Zoramthanga chuan nimin khan Bilkhawthlira YMA General Conference 2021 thlenna tur hmunhma leh rest house sakna turte tlawh in a enfiah.

CM hian  PWD leh Agriculture department hmuna rest house sakna tur tlawhin architect leh surveyor-ten an teh nghal a, YMA khawmpui thlenna tur Bilkhawthlir khelmual panna kawng siamṭhat ngaite leh tuna kawng awm sa chu a len tawk loh avanga kawng thar siamna tur ruahmanna chhawpchhuahte a enpui a, Bilkhawthlir Park cheibawl dan tur thlithlai in, P&E department ram leh health centre a tlawh nghal bawk.

Chief Minister hian Mualkhang LPG Bottling Plant pawh a tlawh a, IOCL hotute nen plant hman a nih leh theih dan tur an sawiho. Petroleum And Explosives Safety Organisation (PESO) endikna hnuhnung berin a phut ang thil ṭul ṭhenkhat siam belh dan tur FCSCA Minister hoa an ngaihtuah tawh chu  Chief Minister chuan theihtawpa hma a lakpui tur thu a hrilh. Chief Minister hi Supply minister K Lalrinliana leh Serlui bialtu MLA Lalrinsanga Ralte-te'n an ṭawiawm.