Assam-a kawngpui dan vangin High Court-ah PIL thehluh a ni

Assam mite'n an state chhunga National Highway-306 an danchah avangin Mizoram Bar Association chuan nimin khan Gauhati High Court, Aizawl Bench-ah public interest litigation (PIL) an thehlut.

Mizoram Bar Association (MBA) tarlan danin, NH-306 danchah chungchangah hian a hmain sorkar laipui, Assam sorkar leh Mizoram sorkarah representation an thehlut tawh a, chhànna an dawn loh avang leh Mizoram mipuiin harsatna an tawh mek avangin High Court-ah PIL an thehlut ta a ni.

PIL hi Aizawl Bench-ah thehluh ni mah se, Aizawl Bench hi Principal Bench hnuaiah a awm mek avangin Principal Bench, Guwahati-ah ngaihtuah a nih theih thu MBA chuan an tarlang.

Nikuma NH-306 danchah a ni ṭum pawhin MBA hian High Court-ah PIL an lo thehlut tawh a, chu chu High Court chuan pawmin, PIL 68 of 2020 ziah luh a ni. PIL 68 of 2020 chu Court-a a inchiah mek laiin NH-306 kawngpui dan tihtàwp a nih avangin PIL chu tihtawp a ni a, MBA chuan PIL dang an thehlut leh ta a ni.

Assam mite'n NH kawngpui an dan chungchangah hian Health minister Dr R Lalthangliana pawhin August 2, Thawhṭanni khan Union Home minister Amit Shah chu lehkha a lo thawn tawh a, Mizoramah Covid-19 nasa taka a darh mek laiin Barak Valley-a kawngpui dan avangin damdawi lam bungruate a táng tih a hrilh.

Dr R Lalthangliana chuan Union Home Minister hnenah hian, Assam state chhunga NH-306 kawngpui dan a nih avangin damdawi lama Mizoram mamawh, Covid-19 swab sample endikna hmanrua leh bungraw dangte ṭhahnem tak Assam state chhungah a tangkhang tih a ziak a, "Hei hi Mizorama Covid-19 veite damdawi mamawh a nghawng dawn a, damlo tam tak chu dinhmun khirh takah an ding mek a ni," a ti.

Health Minister tarlan danin, damdawi lama mamawh tangkhang zingah hian damdawi bakah, oxygen búr, oxygen plant hmanrua leh sample test kit-te a tel a; bungruate chu Mizorama a luh thuai theih nan inrawlh vat turin Home minister Amit Shah a ngen a ni.