COVID-19: Mizoram dinhmun Hripui vei 748 hmuh belh a ni

August 2, Thawhṭanni khan Mizoramah Covid-19 vei mi 748 hmuh chhuah a ni. Nimin khan hripui laka fihlim tawh mi 403 chhuahtir an ni a, hripui vei mi panga an thi.

Covid-19 vei hmuh tharte chu mipa 462 leh hmeichhia 286 an ni a; ZMC laboratory-a hmuh chhuah 162, TrueNAT-PCR hmanga hmuh 38 leh Rapid Antigen Test hmanga hmuh chhuah 548 an ni.

IDSP record angin, Mizoramah Covid-19 vei mi 40,111 hmuh chhuah a ni tawh a, mipa 21,119 leh hmeichhia 18,992 an ni. Nimin tlai dar 5 thleng khan mi 28,045 (69.92%) chhuahtir an ni tawh a, mi 156 (0.38%) thi tawhin, enkawl mek mi 11,910 (29.70%) an awm.

August 2, Thawhṭannia swab sample endik dan chu - ZMC-ah 2,278, TrueNAT hmangin district 10-ah 483 leh RAT hmangin district 11-ah 6,462 a ni a, a vaiin sample 9,223 niin, hripui vei hmuh chhuah 748 chu 8.11% a ni. Positive percentage hi ZMC-ah 7.11%, TrueNAT-ah 7.88% leh RAT-ah 8.48% a ni.

Thawhṭannia Covid-19 positive hmuh dan chu - Aizawlah mi 467, Kolasib-ah 81, Lungleiah 66, Champhaiah 41, Siahaah 35, Lawngtlaiah 31 leh Mamitah 27 an ni. Aizawla veng 58 leh khaw dang 41-a mite an ni a, Kolasib-a veng 13, Lawngtlaia veng pasarih leh Lungleia veng paruk a lang.

Hripui vei hmuh thar mi 748-te chu symptom nei 376 leh nei lo 352 an ni a; tualchhunga kái 745 leh tun hnaia state pawn aṭanga rawn lut mi pathum niin, tualchhunga kái zingah kàina chin hriat loh mi 399 an awm.

Hripui vei hmuh chhuah thar 748 zingah naupang kum tling lo 190 vel awmin, an zinga mi 90 chuangin symptom an nei a; nausen kum khat tling lo pariat an awm. Kum 60 chung lam mi 60 chuang awmin, an zinga a zatve aia tamin symptom an nei a, a upa ber chu kum 87 mi a ni.

Nimin khan tlai dar 5 thlengin hripui laka fihlim tawh mi 403 chhuahtir an ni a; Aizawl district-ah mi 320, Mamit district-ah 28, Kolasib district-ah 23, Lawngtlai district-ah 18 leh Siaha district-ah mi 14 an chhuak.