Sumdawngte'n puan dum an zár

Mizoram Business Coordination Committee (MBCC) ruahman angin dawrkai leh mi hrang hrangte chuan Aizawla total lockdown kalpui mek an duh lohzia lantir nan an in leh dawrahte puan dum an zár a; nimina MBCC hruaitute leh Chief Secretary inkawmnaah ruahmanna thar an neih avangin puan dum zàrte chu la thla turin an inhriattir nghal.

Nimina inkawmnaah hian chief secretary Lalnun­mawia Chuaungo chuan, lirtheia eizawng, ni tin inhlawha eizawng, dawrkai, industry neitute leh automobile hmanga eizawngte harsatna tawh chu sorkarin a hriatthiam­pui thu leh, tuna total lockdown kalpui mek bak chu kalpui a ngaih tawh loh an beisei thu a sawi.

Sumdawngte bungraw chhia leh ruahsur vanga senghawi ngaite singsaa senghawina turin tun kar chhungin ni hnih hun pek an nih tur thu Chief Secretary chuan a sawi a; hei hi MBCC chuan lawmawm an tih thu sawiin, dawr singsa turte chu sorkar dan siamte zawm turin an ngen a ni.