MPCC-in Police leh Vairengte an chhuang Robert-a'n Himanta a tlawn hi kan dem - Congress

Congress party chuan tun hnaia Mizoram leh Assam buainaa Mizoram police leh Vairengte mipui chêt dan chu chhuanawm an tih thu leh buaina kal zela Mizo ṭhalaite'n social media-a theihtawp an chhuah chu an ngaihhlut thu an sawi. Hetih lai hian, Sports minister Robert Romawia Royte chu social media-a Assam chief minister Himanta Biswa Sarma tlawnah puhin, hnam mualphonaa an ngaih thu an tarlang.

MPCC chuan, "Mizo­ram chhung Vairengte-ah Assam police-te'n Mizoram police camp chhuhsaka silai an hmeh puah avangin Mizoram police-te'n huaisen takin an kâp let a, Mizoram police-te hnathawh hi kan chhuang hle. Ramri humhalhnaa hlauh nei loa theihtawp chhuah ṭhin Vairengte mipuite kan ngaihluin kan chhuang tak zet a ni," an ti.

Ramri buaina kal zelah social media-a ṭhalaite'n tha an thawh dan chu chhuanawm an tih thu sawiin MPCC chuan, "India ram leh khawvel mit hmuha thiam chang zawk kan nihzia lantir turin Mizo ṭhalaite'n social media-ah theihtawp chhuahin ṭan an la a ni," an ti a; hnam anga ṭangrual a, mahni tih theih tâwkah ṭhahnemngai taka ram leh hnam tana thawk zel turin an chah.

Hetih lai hian, Sports Minister-in Assam Chief Minister a tlawnah ngaiin MPCC chuan an hriat­thiam loh thu an tarlang a, "Sport minister Robert Romawia chuan tun ramri buainaa mawh­phurtu bera ngaih Assam CM Himanta Biswa Sarma chu Twitter kaltlanga tihlungawi tumin amah tlawnna thu ziak a post a ni," an ti.

Congress party chuan, Robert Romawia chêt dan chu hnam tihmualphonaah ngaiin, "Ram leh hnam tana Mizoram mipui inlungrual taka kan thawhho laia Mizo mipui inpumkhatna leh ṭanrualna tichhe thei zawng leh ṭhalaite rilru tihnual tur záwnga vai hlauh tlawnna thu, tun hnaia buaina nena inkaihhnawih miah lo post a ni hi kan hrethiam lo hle," an ti a, Assam CM tlawnna thu post tawh lo turin Sports Minister an chah.

MPCC chuan, "Sports Minister hian Assam CM Himanta Biswa Sarma hi a hlau viau a nih pawhin, Mizo ṭhalaite hriatah tarlang tawh lo se kan duh tak zet a ni," an ti.