Serchhip YMA-in ramria duty-te an ṭanpui

YMA Sub- Head­quarters, Serchhip chuan Mizoram leh Assam inrina vela duty Mizoram police leh harsatna tuarte ṭanpuina turin nimin khan Rs. 2,95,022 leh chawhmeh chi hrang hrang an pe.

Mizoram leh Assam inkara buaina thleng avanga Mizoram ramri venhim hna thawktute ṭanpuina turin Serchhip Sub-Hqrs YMA chuan Serchhipah pawisa leh chawhmeh dah khawmna siamin an khawn a; chhungkaw ṭhahnem tak leh pawl pahnihin Rs. 2,95,022 bakah, thlai chi hrang hrang an thawh. Chhungkaw eng emaw zat chawhmeh thawh tur an zawng a, 407 truck pakhat, Pik-up pathum phur an thawh khawm a ni.

Pawisa leh chaw­hmehte chu Thawhṭanni zan khan Vairengte panpui a ni a, nimin zing khan thlengin, chawhmehte chu Vairengtea Police duty-te hnenah an hlàn a, Vairengte Joint YMA hnenah a ṭul apianga hman turin Rs. 1,00,000 an hlàn. Saihapui-V leh Phaisen branch YMA-te hnenah Rs. 10,000 ve ve pein, ramria duty hrang hrangah water filter paruk an pe a, Assam sipaite'n an kah hliam PC Lalmuansanga chu Rs. 5000-in an kan bawk. Nimina an hlan bak chu pek leh dan tur an la ruahman dawn a ni.