Lakhuihthei leh dragon fruit thawn chhuak

Horticulture depart­ment leh Clover Organic-te chuan nimin khan Delhi lamah dragon fruit leh lakhuihthei an thawn chhuak a, Horticulture secretary JC Ramthanga'n Horticulture Centre, Chite aṭangin a vailiam.

Sorkar thuchhuah tarlan danin, an thawn chhuahte hi lakhuihthei quintal 11 leh dragon fruit quintal 4 a ni a, air cargo hmangin Delhi panpui a ni. Lakhuihthei hi vawiinah quintal 4 thawn leh a ni ang.

Lakhuihthei hi Tuichangral FPC hnuaia Sialhawk khuaa thar a ni a, dragon fruit chu Horticulture department kaihhruainaa Kolasib leh Kawlkulh khuaa thar a ni.

Covid-19 léng avangin Mizorama kut hnathawktute'n an thei leh thlai tharte hralhna turah harsatna an tawh avangin Horticulture department-in a buaipui a, hlawk zawka an hralh theih nan buaipui zel an tum tih sorkar thuchhuah chuan a tarlang.

Thei thawn chhuah vailiamtu JC Ramthanga chuan, ku thnathawktute thawhrimna leh tumruhna a zara Horticulture department hmasawnna chu ropui a tih thu a sawi a, "Hripui lên lai leh hun khirh lai pawhin Mizoram chuan horticulture production sang tak a nei thei hi department hotute leh hna thawktute inpekna a ni," a ti.