Thangtea leh Rina'n ramri an tlawh

Health minister Dr R Lalthangliana leh Supply minister K Lalrinliana te chuan nimin khan Kolasib, Vairengte leh Kanhmunte an tlawh a; damdawi-in leh Covid-19 kaihhnawih thil tihna hmunte an enfiah.

Minister-te hian Kolasib-ah District Hospital sak ṭhat dan tur a hmunah an en a, Kolasib District Task Force hotute leh khawtlang hruaitute an kâwm. Dr R Lalthangliana chuan, District Hospital chu changtlung zawka thuam tum a nih thu sawiin, oxygen plant NESIDS aṭangin 80 LPM leh PM Cares aṭangin 250 LPM bun tum a nih thu a sawi.

Vairengtea khawtlang hruaitute nen an inkawmnaah Health Minister chuan, ramria duty Mizoram police-te hriselna endik turin Covid-19 Medical Operation Team-te chu vawiinah an kal tur thu a sawi a, "Ramri hrûla duty police-te leh khawtlang hruaitu, duty-te ṭawiawma che chhuakte hi hripui kai an inringhlel a nih chuan a thlàwna endik an ni ang," a ti. Vairengte VC hnenah Rs. 10,000 leh HOPE Centre hnenah Rs. 5,000 a pe nghal a ni.

Dr R Lalthangliana leh K Lalrinliana te hian nimin vek khan Kanhmun khuaa Covid-19 Screening Point, ramria sipai duty-te leh Kanhmun epa Tripura khua Damcherra te an tlawh bawk.

Health Minister chuan, Kanhmun chu ramria awm an nih avangin ṭhenawm state-te nena inkalpawh reng an ni a, hripui lakah an fimkhur reng a ṭul tih sawiin, state pawn aṭanga lutte endik kawngah ṭhahnem ngai taka thawk zel turin a chah a; Rs. 10,000, kut tihfaina leh kutkawr ṭhahnem tak a pe.

Kanhmun Screening Point hi July 2020-ah mumal taka kalpui ṭan a ni a, mi 14,450 enfiah (screen) tawh niin, RAT hmangin mi 12,122 endik a ni tawh a, Covid-19 positive mi 91 hmuh a ni tawh. Hripui vei hmuh chhuahte chu district chhunga enkawlna hmun hrang hrangah dah an ni a, Kanhmuna hripui vei enkawlna hmunah mi 51 enkawl mek an awm.

Minister-te hian Kanhmun nena inzawm deuh renga awm Tripura khua, Damcherra an tlawh bakah, Mizoram leh Assam daidangtu Medili lei an tlawh a; ramria duty police-te an fuih. Dr R Lalthangliana chuan, Medili lei tawpa Assam hoin kawngpui an dang chu ṭha a tih loh thu a sawi a; police duty-te hnenah Rs. 10,000 a hlan a ni.