Mamita hnathawh mekte enfiah

Mamita pawl hrang hrang - District Sport Committee, Mamit Games & Sport Association, MZP, MSU leh Mamit District Ṭhalai Pawl hruaitute chuan nimin khan Mamit Multipurpose Indoor Stadium leh Mamit khelmual siam mekte a hmunah an enfiah a; a ṭha thei ang bera siam turin contractor-te an hrilh.

Pawl panga hruai­tute chuan, Mamit Multipurpose Indoor Stadium sak meka balu an hman chu ṭha tâwk loa an hriat avangin hmang chhunzawm lo turin hna thawktute an hriattir a, Langkaih balu ngei hmang turin an ngen. Multipulpose Indoor Stadium sakna atan hian cheng vbc. 12.5 ruahman a ni.

Mamita NGO leh sport association hruaitute chuan nimin vek khan Mamit District Hospital, khum 100 awm theihna tura sak mek a hmun-ah an enfiah bawk a; damdawi-in sak chu sum siam nan mai hmang lo a, hmangaihna nen hna thawk a, hming chher nana hmang turin a satute an chah. District Hospital sakna atan hian cheng vbc. 17.93 ruahman a ni a, Zamzo Construction & Consultancy-in an sa a ni.

Mamita pawl hruaitute hian Mamit District Hospital-a medical superintendent Dr T Lalrintluanga chu a pisaaah an hmu bawk a; District Hospital-a TrueNat laboratory-a swab sample endik result chhuak har ṭhin avangin hripui inkai darh theihna a san thu an thlen. Medical Superintendent chuan, bialtu MLA-in laboratory technician pahnih a pek tawh avangin thawktu dinhmun a ziaawm tawh a, tunah chuan sample endik tur lak khawm sa endik loh an neih tawh lo thu a sawi.

Pawl panga hruai­tute hian Medical Superintendent hnenah hian hripui donaa a ṭulnaa hman atan Rs. 4,000 an hlan nghal a ni.