Hripui vangin mi 5 thih belh; mi 156 an thi tawh

Nimin khan Mizo­ramah Covid-19 vangin mi panga an thi a, sorkar chhinchhiah angin, hripui vanga thi zat chu mi 156 an ni tawh.

Thawhṭanni zan zanlai pelh hnu nimin zing dar 1 khan Covid-10 vei State Referral Hospital-a enkawl lai Vanlalhriati (40), Hnahthial chu a thi a, hripui vanga thi 152-na niin, nimin khan Hnahthialah vui a ni. Thu dawn danin, amah hi Serchhip P&E Venga khawsa ṭhin a ni a, a damloh avangin inentir turin Aizawlah an kal a, Covid-19 positive a ni tih July 19, 2021 khan Aizawlah hmuh chhuah niin, SRH-ah dah luh nghal a ni.

Nimin zing dar 2:20 khan Vanlal­ringa (67), Vairengte IOC Veng chu hripui vangin Kolasib DCHC (District Hospital)-ah a thi a, nimin khan hall-ah vui a ni. Amah hi Covid-19 positive a ni tih August 2, Thawhṭanni khan hmuh chhuah niin, Kolasib District Hospital ICU-ah dah luh nghal a ni a, hripui a vei tih hmuh chhuah a nih zanah a thi a ni.

Rita Thanseii (82) w/o Ṭhuam­luaia (L), Sairang Dawr Veng pawh nimin zing dar 7:40 khan hripui vangin Sairang damdawi-in (DCHC)-ah a thi a, nimin chhun dar 11 khan YMA Hall-ah vui a ni. Covid-19 positive a ni tih July 25, 2021 khan hmuh chhuah a ni a, July 26-ah Sairang damdawi-inah dah luh a ni. Kum upa, chak tawh lo a ni tih lo chu natna dang sawi tur a nei lo tih Sairang khawtlang hruaitute'n an sawi.

Nimin zing dar 9:25 khan R Thangzova (80) h/o K Lalzamliani, Govt Complex, Aizawl chu hripui vangin SRH-ah a thi a, nimin tlai dar 4 khan YMA Hall-ah vui a ni. Thu dawn danin, R Thangzova hi zunthlum nei a ni a, Covid-19 vei a ni tih July 30 khan hmuh chhuah niin, SRH-ah enkawl nghal a ni.

Nimin tlai dar 6:05 khan Lalliankimi (39), Meisatla, Siaha chu Covid-19 avangin SRH-ZMC-ah a thi a, vawiinah vui a ni ang. Lalliankimi hi Covid-19 positive a ni tih July 16, 2021 khan hmuh chhuah a ni a, SRH-ah enkawl nghal a ni.