Sumdawngte'n kawngpui hawn an duh thu President-ah an thlen

Mizoram sumdawng pawl hrang hrang intêl khawm, Mizoram Business Coordination Committee (MBCC) chuan, Assam-in Mizoram luhkâ kawngpui an dang reng chu hlip turin India President hnenah an thlen. An ngenna lehkha hi nimin khan Mizoram Governor kaltlangin an thehlut.

MBCC chuan, July 26, 2021-a Mizoram leh Assam-te ramri chungchanga an intihbuai dan leh a bul ṭantu Assam an nih thu an ziak a; chumi kal zela Assam-in NH-306 an dang chu Mizo mipui tana harsatna thlentir tumna liau liau a nih vangin titawp turin President an ngen a ni.

MBCC lehkhaah hian, NH-306 leh rél kawng chu sorkar laipui kuta awm a nih angin a tlang ngei theihna turin sorkar laipuiin hma la se an duh thu an ziak a, "Mizo mipui hi mi dangte anga India khua leh tui dik takah min ngai a nih chuan intluktlanna kan neih hi a takin lantir rawh," an ti. Ei leh in tur, ni tin mamawh thil, damdawi, diesel leh petrol-te tluang taka a luh leh theihna tura a thuneihna hmang turin President hi an phût a ni.