Duhoma'n Thenzawl CHC ambulance a pe

Serchhip bialtu MLA Lalduhoma chuan nimin khan a bial chhunga Thenzawl damdawi-in (CHC)-a hman turin ambulance a pe.

Nimin khan Vantawng Group YMA Rûn, Thenzawl Bazar Vengah ambulance inhlanna buatsaih a ni a, Thenzawl Town Task Force Committee chairman Lalropuia Sailo-in a kaihruai. MLA chuan Thenzawl CHC medical officer Dr Remlalnghaki hnenah ambulance a hlan a ni.

Lalduhoma chuan, hripui léng karah sum harsatna avangin nikumah MLA fund cheng nuai 40 an dawng kim lo tih sawiin, "Kuminah MLA fund first instalment-ah a zatve chauh pek an ni rih a, ram sum dinhmun thlirin tun bak kan sorkarin min pe chhunzawm tawh lo mai ang tih hlauhna kan nei lian hle a ni," a ti.

Sorkarin MLA-te hnenah an dawn zat tur pangngai a pe thei a nih chuan MLA fund hmangin nasa zawka hmalak theih a beisei thu sawiin Duhoma chuan, sorkar sum harsatna chu hriatthiampui a ngaih thu a sawi a, "Mipui mamawhna a san avangin ambulance leina turin MLA fund aṭangin a theih ang angin sum ngaihtuah a ni," a ti a; ambulance chu a mamawh apiangte tan a thlàwna hman a rem loh pawhin, mipui zângkhai deuhna tur ruahman ni se a duh thu a sawi.

Lalduhoma chuan, amah thlangtute tan chauh MLA a ni lo a, a bial mi tin tan MLA a nih thu sawiin, "Tu mah en hran ka tum lo," a ti a; mamawh nei leh amah be duhte chu inthlahrung loa bei turin a chah a ni.