CYMA-in PIL thehluh an thláwp

Central YMA chuan thuchhuah siamin, Assam sorkar bultuma Assam mite'n NH-306 kawngpui July 26, 2021 aṭanga an dan chungchanga Mizoram Bar Association (MBA)-in Gauhati Hight Court, Aizawl Bench-a PIL an thehlut chu lawmawm an tih thu leh an thlâwp thu an tarlang.

NH-306, Mizoram châk lâkna kawngpui dan pin a nih loh thu Assam minister Ashok Singhal-a'n NELive TV channel-ah August 2, 2021-a a sawi chu dâwt hmanga hmai phih tumnaa an ngaih thu tarlangin CYMA chuan, "Vawiin thlengin NH-306 dan pin tlat a la ni a, lirthei eng mah a la kal tlang thei lo. Lirthei tangkhang mek zingah hian Covid-19 veite inenkawlna tur damdawi leh hmanrua phurtu eng emaw zat an tel a ni," an ti.

CYMA chuan, nimina Assam Tribune chhuakin a tarlan, hmarchhaka BJP MP-te'n New Delhi-a Prime Minister hnena ramri buai chungchang memorandum an thehluhah, 'Assam-Mizoram ramri buaina hi ram dang inrawlhna a ni,' tia an sawi chu thu dik lo a nih thu an sawi a; hemi chungchang hi sorkar laipui kaihhruaina hnuaiah chhui chian ngei an phût thu an tarlang.

Central YMA chuan, Mizoram-Assam ramri buaina vanga Mizo mipui ṭanrualnaah lawmthu an sawi a; eng harsatna pawh hmachhawn thei turin Mizo mipui an ngen bawk.