KHAWTHLIR
Ráltlân tanpuina
Central YMA hnuaia Myanmar ráltlânte ṭanpuina ngaihtuahtu committee ruahman angin nimin khan raltlante chhawmdawlna atan Tuipuiral Group YMA hnenah Rs. 20,000 leh Tuiphai Group YMA hnenah Rs. 30,000 an hlân. Nimina pek chhuah ṭanpuina sum Rs. 50,000 hi Tuikual Presbyterian Kohhranin an thawh a ni.
SRH-ah 267 awm
State Referral Hospital-ah nimin khan Covid-19 vei mi 11 dah luh thar an ni a, mi 44 chhuahtir an nih bakah, hmun danga enkawl turin mi 14 sawn an ni thung a, hripui vei mi 267 enkawl mek an ni. Mi 267 zinga 32 chu ICU-ah awmin, ventilator hmantir mi 20 an awm. Ward hrang hrangah mi 235 an awm a, an zinga mi 81 chu oxygen pek mek an ni. Nimin khan nau piang pahnih an awm a, dialysis tihsak pali an awm bawk.
IGNOU exam
Indira Gandhi National Open University (IGNOU) chuan nimin khan final year zirlaite tan exam an ṭan. IGNOU-ah hian January leh July session a awm a, January session ho December thlaah an exam ṭhin a, July session-te chu June-ah an exam ṭhin. July session zirlaite tana exam hi August 9, 2021 thleng neih a ni dawn a; master degree leh degree course final year-te leh diploma & certificate course zirlaite tan a ni.
SOP tidanglam
SDMA hnuaia State Executive Committee chuan total lockdown chungchanga inkaihhruaina ṭhenkhat nimin khan an tidanglam. Inkaihhruaina an tihdanglam chu dawr leh sumdawnna hmun dangte kalpui dan tur a ni a; August 4-7, 2021 inkarah dawr bungraw singsa tur leh senghawi turin hawn phal a ni. Dawr awmna venga local task force-te chu ruahmanna siam tura tih an ni.
I-Day lawmna
Aizawl DC Dr Lalhriatzuali Ralte hoin nimin khan Planning conference hall-ah kumin August 15-a Independence Day lawm dan tur an rêl a ni. I-Day hi zing dar 7-ah Lammuala lawm tum a ni a, hripui léng avangin mi tlemtê telna tura ruahmanin, sorkar hnathawk joint secretary leh a chung lamte chauh tel tura rèl a ni.