Lungleiah RTPCR laboratory din turin High Court-in Mizoram sorkar a hriattir

Gauhati High Court chuan Lungleiah RT-PCR laboratory din tur leh hma la nghal turin Mizoram sorkar a hriattir Mizoram sorkarin chhim lam district-te'n RT-PCR laboratory an mamawh lo tih a lo tarlan tawh chu Court-in a pawm loh thu leh district dangah Covid-19 veite enkawlna damdawi-in din thuai turin a hriattir bawk.

RTPCR for Chhimbial chuan LH Lalzarzoliana, Lunglei hmingin kumin June thla tìr lam khan Gauhati High Court, Aizawl Bench-ah public interest litigation (PIL) an thehlut a, chhim lamah RTPCR khawl bun a nih theih nan hma la turin an ngen a ni.

PIL hi Justice Michael Zothan­khuma leh Justice Nelson Sailo te ṭhutna Gauhati High Court Principal Bench chuan July 27 leh 28 khan a ngaihtuah a; nimin khan thutlukna (judgement order) an tichhuak a ni.

High Court chuan, judgement order chhuah aṭanga ni sarih chhungin Mizoram sorkara Health Secretary chu RTPCR laboratory dinna tur ngaihtuahtu tur committee siam turin a hriattir a; committee-ah chuan member pali aia tlem lo awm tur leh, member zingah chuan YMA Sub-Headquarters, Lunglei President leh Lunglei Ṭhalai Pawl Chief Organizer telh ngei turin a hriattir bawk.

High Court order-a a lan danin, RTPCR laboratory building peih hmaa laboratory din a nih theih nan committee chuan an bawhzui ang a; ni sarih chhungin Lunglei Zotlanga Tourist Lodge leh in dang, laboratory din theihna tur an enfiah dawn a ni.

Committee-in RT-PCR khawl bun theihna hmun remchang an hmuh chuan RT-PCR labo­ratory din tur a ni a, bungrua leh thawktu mamawhte chu ngaihtuah nghal tur a ni. Indian Council of Medical Research (ICMR) pawh a ṭul anga hma la a, Lungleia RTPCR laboratory dinna atana hmalaknate chu enfiaha pawmpui thuai turin Court chuan a hriattir bawk.

Health Secretary-in June 14, 2020-a lehkha a tihchhuahah Lunglei Civil Hospital huang chhungah emaw, a pâwnah emaw makeshift RTPCR lab. din a remtihna thu tarlan a ni a; Health Secretary vêkin August 30, 2020-ah makeshift RTPCR lab. dinna tur zawng tura tihna lehkha a tichhuak leh a ni.

Gauhati High Court chuan, Mizoram pumah Covid dedicated hospital pakhat chauh a awm chu thil mak a nih thu tarlangin, "Hei vang hian Covid-19 vei, hmun hla zawka awmte chu dinhmun ṭha lo takah an awm phah a ni," a ti a; Covid-19 vei Vansangpuii, Lawngtlai chu ZMC panpui a nih laiin kawng lakah a thih thu a tarlang.

August 3, 2021-a chhuak Vanglaini leh Aizawl Post chanchinbu-ah ZMC Director-in ZMC-ah damlo awm thei zat aia tam an awm thu a sawi tih tarlangin Court chuan, "Hei hi thil 'serious' tak a ni a, state sorkar hian hripui leng donaah state pumah nasa zawkin hma a la tur a ni," a ti.

High Court chuan, "A chunga tarlan tawhte ngaihtuahin, State respondent (sorkar)-in tun dinhmunah Mizoram chhim lam district palite'n RT-PCR laboratory an mamawh lo a tih chu pawm theih a ni lo," a ti. Mizoram pumah Covid vei tam tak an awm avangin Mizoram sorkar chu Covid dedicated hospital tam din turin a hriattir a ni.

Gauhati High Court chuan, state sorkarin April 20, 2021 aṭangin chhum lo chat loin lockdown a kalpui tawh tih tarlangin, "Hei hian hripui léng do a pawimawhzia a lantir a ni," a ti a; Mizoram sorkar chu Covid-19 thawh thumna thleng theiah nasa zawka inbuatsaih turin a chah bawk.

PIL thehluttu hi LH Lalzarzoliana, Serkawn, Lunglei a ni a, a aiawhin ukil JC Lalnunsanga, Lalrinhlua Tlau, Baby Lalduhsangi leh Lalrokunga Pautu te an ding. State sorkar aiawhin advocate general D Das, additional advocate general AD Choudhury leh central government council Zairemsangpuii (sorkar laipui aiawh)-te an ding thung. Hearing chu online kaltlangin neih a ni.

Sorkar lam aṭanga mawhphurtu hming langte chu - Chief Secretary, Health Secretary, Hospital & Medical Education Director, Lunglei Civil Hospital Medical Superintendent, sorkar laipuia Home Secretary leh Health & Family Welfare Secretary, ICMR Director General te an ni.

High Court order-ah hian Zodintluanga'n June 26, 2020-ah Lunglei Civil Hospital tan RT-PCR khawl a pek thu te, chu khawl chu bun (install) dan a rang thei ang bera ngaihtuah turin Hospital & Medical Education Director-in May 7, 2021-ah Lunglei Civil Hospital Medical Superintendent a hriattir thu te, June 16, 2020-a Lunglei Civil Hospital endiktu expert team-in RTPCR lab. a din theiha an ngaih thute tarlan a ni bawk.