COVID-19: Mizoram dinhmun Hripui vei 885 hmuh belh a ni

August 3, Thawhlehni khan Mizoramah Covid-19 vei mi 885 hmuh chhuah a ni. Nimin khan hripui laka fihlim tawh mi 430 chhuahtir an ni a, hripui vangin mi pakhat a thi.

Covid-19 vei hmuh tharte chu mipa 412 leh hmeichhia 473 an ni a; ZMC laboratory-a hmuh chhuah 338, TrueNAT-PCR hmanga hmuh 27 leh Rapid Antigen Test hmanga hmuh 520 an ni.

Hripui vei hmuh thar mi 885-te chu symptom nei 351 leh nei lo 534 an ni a; tualchhunga kái 876 leh tun hnaia state pawn aṭanga rawn lut mi pakua niin, tualchhunga kái zingah kàina chin hriat loh mi 443 an awm.

IDSP record angin, Mizoramah Covid-19 vei mi 40,996 hmuh chhuah a ni tawh a, mipa 21,531 leh hmeichhia 19,465 an ni. Nimin tlai dar 5 thleng khan mi 28,607 (69.78%) chhuahtir an ni tawh a, mi 157 (0.38%) thi tawhin, enkawl mek mi 12,232 (29.84%) an awm.

August 3, Thawhlehnia swab sample endik dan chu - ZMC laboratory-ah 1,813, TrueNAT hmangin district 10-ah 319 leh RAT hmangin district 11-ah 7,038 a ni a, a vaiin sample 9,170 niin, hripui vei hmuh chhuah 885 chu 9.65% a ni. Positive percentage hi ZMC-ah 18.64%, TrueNAT-ah 8.46% leh RAT-ah 7.38% a ni.

Thawhlehnia Covid­-­19 positive hmuh dan chu - Aizawlah mi 613, Kolasib-ah 125, Lungleiah 65, Siahaah 34, Lawngtlaiah 27, Mamitah 16, Serchhipah pathum leh, Champhai leh Saitualah mi pakhat an ni. Aizawla veng 67 leh khaw dang 33-a mite an ni a, Kolasib-a veng pakua, Lunglei leh Lawngtlaia veng pasarih ve ve a lang.

Hripui vei hmuh chhuah thar 885 zingah naupang kum tling lo 260 vel awmin, an zinga mi 90 velin symptom an nei a; nausen kum khat tling lo 10 awmin, symptom nei an awm nual. Kum 60 chung lam mi 40 chuang awmin, a zatve velin symptom an nei a, a upa ber chu kum 94 mi a ni.

Nimin khan tlai dar 5 thlengin hripui laka fihlim tawh mi 430 chhuahtir an ni a; Aizawl district-ah mi 308, Kolasib district-ah 57, Mamit district-ah 37, Saitual district-ah 21, Lawngtlai district-ah panga leh Siaha district-ah pahnih an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 10,954 hmuh chhuah a ni tawh a, TrueNAT-PCR hmangin 2,471, RAT hmangin 27,570 leh Guwahati-ah pakhat hmuh chhuah a ni tawh.

IDSP tarlan danin, August 3, 2021 thlengin Mizoramah swab sample 6,53,219 endik a ni tawh a, chu'ng aṭanga Covid-19 vei hmuh tawh zat 40,996 chu 6.28% a ni. Hripui vei hmuh tawh zinga mi 36,773 chu Mizoram chhunga kái chhâwng an ni a, mi 4,223 chu Mizoram páwn aṭanga an rawn luh hnua hmuh chhuah an ni.