Mizoram leh phai lam journalist-te inkâwm: Mizoram sorkar aiawhte'n biak an harsat ṭhin thu sawi chhuak

Mizoram leh Assam inkara buaina thleng a hmuna zir chiang tura rawn kal phai lama journalist-te chu nimin khan Aizawl Press Club-ah MJA huaihawtin Mizo journalist-te nen an inkâwm.

Mizoram chanchin thar inhrilh tawnnaa thawhhona leh inpawhna ṭha zawk a awm theih dan turte leh pawimawh dangte an sawiho a; phai lam journalist-te chuan Mizoram sorkar aiawhte biak pawh an harsat ṭhin thu an sawi chhuak.

Inkawmhonaah hi Mizoram Journalists' Association Gen.Hqrs president Zonunsanga Khiangte-in a kaihruai a; tun hnaia Mizoram-Assam ramria thil thlenga thil thlen dan dik tak hre chiang tura a buzáwl ngeia luhchilhtu national media-te chu Mizo journalist-te'n an lo lawm tih sawiin, "Mizoram hi ram kilkhâwra awm kan nih avangin a ram leh a chhunga chêngte chanchin hi ram chhung hmun danga media lian zawkte'n an hre chiang tâwk lo fo a, hei hi tuna national media rawn kalte'n an rawn thlak danglam ta a ni," a ti.

Phai lam journalist rawn kal zinga senior ber Subir Bhaumik, NDTV chuan, Mizoram chanchin leh thuthar awmte hriat zung zung theihna turin Mizo journalist-te'n tan an lâk lehzual a ṭula a hriat thu a sawi a; ṭhalai zawkte chu tuna an thlen chinah duhtâwk mai lo a, India ram chhung leh ram páwn thlenga journalist hriat hlawh nih tum turin a fuih.

CNN-IBN reporter Amit Pandey chuan, tun hnaia Mizoram-Assam inrìna bula thil thleng leh hun dangah pawh, Mizoram kaihhnawih thil hriat duh an neihte state aiawh ni theia an ngaih an zawhte'n chhànna an pe ṭha ngam lo ṭhin tih a sawi a, "Hei vang hian kan duh angin report lái leh kimchang zawk kan pek theih loh phah cháng a awm ṭhin a ni," a ti.

Phai lama journalist-te chuan, Delhi aṭangin state danga thil thleng an hriat duh a awmin, an hriatna awlsam leh rang ber chu state MP-te an nih laiin, hmarchhak state MP tam zawk chu biak ṭawng an har tih an sawi a; media hmachhawn an hreh tlangpui nia an hriat thu an sawi bawk.

MJA member-te pawhin India ram laili zawka chengte'n Mizoram chanchin, a ṭha lam an tilang tlem a, an ngaihven tâwk loa an hriat thu an sawi a; tun ṭuma thil thleng pawh state pahnih police inkahna thleng leh thihna hian a thlen vanga ngaihven loh theih loh ni ta nia an hmuh thute an sawi a ni.

Ram pum huap print leh visual media hrang hrangte'n an aiawh (reporter) Mizoramah dah ve thei se an duh thu leh chutiang ti thei tur chu Mizo ṭhalai, mass communication leh a kaihhnawih zir chhuak an awm nual tawh thute an lo hrilh bawk.