MNF-te NEDA leh NDA aṭanga inhnûkdâwk turah ZPM-in an ngai

ZPM party chuan thuchhuah siamin, sorkar laipui leh Assam state-a BJP kaihhruai sorkarin Mizoram an diriam em avangin Mizorama sorkarna chelhtu MNF party chu BJP kaihhruai NEDA leh NDA an zawmna aṭanga inhnûkdâwk tura an ngaih thu an tarlang.

ZPM chuan, Assam sorkarin Mizoram chu a theihna zawng zawngin an hrêk mek thu sawiin, "Ruihhlo leh smuggling-a sum­dawngah hial min puh. July 26, 2021-a state pahnih police-te inkahna denchhena thubuai ziah luhte Mizoram sorkarin a hnuhkîr vek hnuah Assam sorkar chuan a hnûkkîr kim ve duh lo a ni," an ti.

Aitlang leh Buarchepa Assam police post ṭhiah a la ni lo tih sawiin ZPM chuan, "Mizorama zin lo tura travel advisory an chhuah te, lirthei special checking nei tura thu an chhuahte sût a la ni lo," an ti a; hengte avang hian ramri chungchangah emaw, July 26-a inkahna kaihhnawihah emaw inremna zawnga state pahnih hotute an inbe dawn a nih chuan, kawngpui danga inhrêkna leh dâwta inpuhnate chu Assam sorkarin a sût hmasa tura an ngaih thu an sawi.

Hripui avanga harsatna vàwr­tàwp a thlen mek laia damdawi phur lirthei thlenga Assam sorkarin an hrêk duh chuan Mizoram mipui laka Assam sorkar rilru a tichiang viaua an ngaih thu ZPM chuan an tarlang a; hripui leh natna benvawn neite nunnain a tawrh lohna turin damdawi leh bungraw mamawh hmanhmawh zualte chu thlawhtheihna hmanga la lut turin Mizoram sorkar an ngen.

ZPM party chuan, "Central leh Assam state-a BJP sorkarin heti taka Mizoram a diriam tâkah chuan, Mizorama ruling MNF party pawhin NEDA leh NDA a zawmna hian awmzia a nei tawh lo tih hriain, an inhnûkdâwk ngam turah kan ngai a ni," an ti.