MPYCC leh NSUI-in lungawi lohna lantir

Mizoram Pradesh Youth Congress Commi­ttee (MPYCC) leh National Students' Union of India (NSUI), Mizoram hruaitute chuan nimin khan Raj Bhavan gate bulah Assam mite'n NH-306 an dan leh Assam chief minister Himanta Biswa Sarma chêt dan duh lohna an lantir a; President Ram Nath Kovind hnenah lehkha an thehlut nghal.

Raj Bhavan hmar lam gate bula lungawi loh lantirnaah hian MPYCC president Dr Lalmal­sawma Nghaka, NSUI Mizoram president RB Lalmalsawma leh pawl pahnih office bearer-te an tel a; Dr Lalmalsawma chuan, "Hmarchhaka rorel pawl inhlâwm khawm North East Democratic Alliance (NEDA) hian eng nge awmzia a neih? NEDA hi hmarchhak mipui hmasawnna leh inunauna atana din a ni hlawl lo, BJP leh a thurualpuite'n politics-a chakna an neih theih nan chauha din a ni," a ti.

MPYCC President chuan, "Mizoram mipui innghahna hnár ber NH-306 Assam-in an dang ping tlat a, Ministry of Home Affairs-in hre reng chunga ngawih a chuh hi kan dem hle. Ngawih chuh tlat prime minister Narendra Modi leh Home minister Amit Shah te hi kan dem tak zet bawk," a ti a; Mizo mipui zahawmna humhim nan Assam CM Himanta Biswa Sarma thu berna NEDA an zawmna chhu chat turin MNF party an ngen tih a sawi.

Congress ṭhalai President chuan, hmar­chhak state-a ramri buai tam chhan ber Citizenship (Amendment) Act vang a ni tih sawiin, "Hei vang hian Mizoram MP-te pawh sorkar laipuia CAA an thlàwpna titawp nghal turin kan ngen a ni," a ti.

MPYCC hian Mizoram Governor kaltlangin Pre­si­dent Ram Nath Kovind hnenah lehkha an thawn a; Assam-in a ṭhenawm state - Mizoram, Meghalaya leh Nagaland-te nen ramri buai a neih avangin hmar­chhak bialah remna leh muanna a awm theih nan inrawlh turin an ngen. Ramri buai leh a kaih­hnawih thil dangte an thlen a ni.