Phai lam journalist-te'n HM an kâwm

Ramri buai leh a kaih­hnawih zir chiang tura rawn kal phai lama journalist-te chuan nimin khan Home minister Lalchamliana chu a pisaah an kâwm.

Home Minister chuan, state pahnih inkarah boruak rálmuang a awm leh an duh ber tih sawiin, July 26-a state pahnih inkara buaina thleng leh mitthi an awm chu pawi a tih thu a sawi a; mitthi chhungte a tawrhpui thu leh hliamte chu an dam leh thuai a duhsak thu a sawi a ni.

Lalchamliana chuan, tharum thawhna hmanga buaina chinfel chu thil ṭha a nih loh thu leh ṭhian anga inen a, inrem taka dawhkan kîla sawiho a pawimawh ber thu a sawi a, "Rilru tluang tak kan put tawn chuan state pahnih inkara inrem lohna awm hi chinfel theih loh a nih chhan tur a awm lo," a ti.

Journalist rawn kalte hi BBC columnist, CNN-IBN/News18, Federal.Com leh ETV Bharat mite an ni a; August 3, Thawhlehni khan Mizoram rawn thlengin, Kolasib district an pan nghal a, nimin khan Vairengte leh a chhehvel an tlawh a ni.