MOT leh IMA-in ramria duty-te an tlawh

Medical Operation Team (MOT) on Covid-19 member-te leh Indian Medical Association (IMA) Mizoram hruaitute chuan nimin khan Vairengte an tlawh a; hripui laka invênna hmanrua leh taksa tichak thei tur thil chi hrang hrang leh pawisa an pe.

MOT hi an chairman Dr ZR Thiamsanga, MLA hoin an kal a, ramria duty police an tlawh bakah, Vairengte khawtlang hruaitute nen an inkâwm. Police duty-te tan Vairengte Police Station OC hnenah Rs. 30,000 leh Vairengte Joint VC tan chairman R Lalfamkima hnenah Rs. 10,000 an hlan a; pulse oxymeter, damdawi chi hrang hrang, hripui laka invenna hmanrua, vitamin leh taksa tichak tur ei tur chi hrang hrang an pe bawk.

Dr ZR Thiamsanga chuan, Mizoram police-te leh Vairengte leh a chhehvel mipui huaisenna leh inpeknain Mizo mipuiah hnam hmangaihna thinlung a put thartir tih a sawi a, "Thinlung takin kan chhuang che u a, kan ram neihchhun hi hum tlat turin hnungtawlh loa hma lam pan zel turin kan chah che u a ni," a ti.

MOT Chairman Dr Thiamsanga chuan, Mizo sipaite'n Mizoram humhim tura huaisen leh chhel taka an beihna an ngaihhlutzia lantir nan leh an tana ṭangkai theihna a nih ringin an tlawh tih a sawi a; MOT leh IMA-te chuan an tih ve theih chinah theihtawp chhuah an inhuam thu a sawi bawk.

MOT leh IMA member-te hian July 26-a inkahna hmun an tlawh bakah, Vairengte, Saihapui leh Phaisen vela Mizoram police duty-te an tlawh kual a; Saihapui VC President, Saihapui duty post commander, Phaisen VC President leh duty post commander-te hnenah Rs. 5,000 ṭheuh an hlân a ni.

MOT leh IMA aṭanga kalte hi Dr ZR Thiamsanga bakah, Dr Lalhmuchhuaka, Dr Ringmaia, Dr Chawnglungmuana, Dr Don S Halliday leh Dr Sangzuala te an ni.