Minister Robert Romawia báng turin an phût - Mizo mipui zahawmna hralh záwnga a che hi kan ngai thutak hle : ZPM Ṭhalai

ZPM Ṭhalai chuan thuchhuah siamin, minister of state Robert Romawia Royte chu Mizo mipui zahawmna hralh hnial loah an puh a, minister aṭanga báng turin an phût a; Assam chief minister Himanta Biswa Sarma laka Mizo mipui zahawmna hralh zawnga a awm chu an ngai thutak hle tih an sawi.

ZPM ṭhalaite chuan, tun hnaiah Himanta Biswa Sarma kaihhruai Assam sorkarin buaina an siam kal zelah Mizoram châk lakna kawngpui leh rél kawngte an dang a, Covid-19 kaihhnawih bungrua thlenga an dan avangin Mizo mipuiin an phâk tâwk kawng tinrengah Himanta Biswa Sarma an bei lêt mek tih an tarlang. Minister Robert Romawia Royte erawh chuan a Twitter aṭangin Assam CM chu a langsar thei ang berin a tlawn tih sawiin, "Kan Minister-in Mizo mipui zahawmna a lo hralh hi ná kan ti hle," an ti.

Robert Romawia chu ramri chungchanga Mizo mipui ṭanrualna zah zo loah puhin ZPM ṭhalai chuan, "Vai lal hmaa a tláwm hian ramri chungchanga Mizo mipui ṭanrualna a zah zo lo tih a pho lang chiang hle. Mizoram rorelna khawl leh minister dinhmun nasa takin a tibawrhbáng a ni," an ti a; chutiang mi chu Mizoramin a mamawh loh thu an sawi.

ZPM Ṭhalai chuan, Robert Romawia chu a mimal hamṭhatna turah chuan Mizo mipui zahawmna hralh hnial loa an ngaih thu an tarlang a, "Mizo mipui zahawmna hralh záwnga a che hi kan ngai thutak hle a, Mizoram mipui hnenah ngaihdam dilna siam a, minister aṭanga báng ngam turin kan phût a ni," an ti.