Speaker-in a biala leimin a enfiah

Legislative Assembly speaker Lalrinliana Sailo chuan August 3, Thawhlehni khan a bial, Chalfilh huam chhunga Khawruhlian leh Hmunnghak chhehvel hmun hrang hranga lei min leh tawlh leh kawngpui ping mekte a hmunah a enfiah.

Sorkar thuchhuah tarlan danin, Thawhlehni zing khawvar hmaa ruahsur avangin hmun hrang hrangah lei a min a; Khawruhlian thlen hma hmun ṭhenkhata nasa taka lei minte chu lirthei kaltlang theih turin Thawhlehni vêk khan then nghal a ni. Khawruhlian leh Hmunnghak inkara leimin erawh chu kawngpui pumpui deuhthaw bal a nih avangin lirthui tlân tlang theih a ni rih lo.

Kum 2017 aṭangin Khawruhlian khaw hnuaiah NH-150 kawngpui zauhna turin laih a ni a, chu chuan Khawruhlian innghahna leilung a khawih chêa ngaih niin, kum tin fûrpui a thlen apiangin harsatna an tâwk ta a ni. Kawngpui thar laih hi Mizoram aṭanga Manipur pawhna a ni a, ruahmanna ang chuan Act East Policy hnuaiah Kaladan Multi Modal Transit Transport Project-a kawngpui sial mek a pawh dawn bawk a ni.

Speaker Lalrinliana Sailo hi PWD chief engineer (Highway) Lalruatkima leh hotu dangte'n an ṭawiawm a ni.