Zûk leh hmuam sim theih nan hma la

National Tobacco Control Programme (NTCP)-a thawktute chuan zûk leh hmuamin Covid-19 veite tan harsatna a siam belh theih avangin theihtawpin hma an la mek a; hripui vei enkawl mek zingah zûk leh hmuam sim duh an awm avangin a theih ang angin Covid care centre (CCC)-te tlawh kualin, an sim theih nan hma an la ṭhin.

NTCP-a thawkte chuan, kumin June thla aṭang khan Aizawl district-a CCC hrang hrangah zûk leh hmuam sim duh mi 59 an awm tawh tih sawiin, "Heng mite hi Tobacco Cessation Clinic (TCC) service a theih ang angin pek an ni," an ti a; CCC-a medical duty-te'n ṭhahnemngai taka an lo ṭawiawm ṭhin avangin an lawm hle tih an sawi.

Mizoram mipui zinga a zatve chuang, 58.7% chu vaihlo zûk leh hmuam ti mek an nih thu sawiin NTCP-a thawkte chuan, "CCC-a enkawl mek zingah zûk leh hmuam ti tam tak an awm ṭhin. Mi tam zawkin awm khawmna/puipunna hmunah mi dang bula meizûk an sim tawh laiin, CCC chhungah mi dang bula meizûk mai chingte an la awm a, an bula awmte'n mei an zûk khum ṭhin avangin mei zu awm lohna pindana insawn dilte pawh an awm ṭhin tih hriat a ni," an ti.

NTCP-a thawkte chuan, vaihlo túrin Covid-19 natna a belhchhah thei tih leh mahni leh bul hnaia awmte tan harsatna an thlen thei tih hria a, vaihlo zûk leh hmuam sim turin mipui an ngen a; DCHC, CCC, CCCC-te chu vantlang hmun a nih avangin meizûk phal lohna hmun a ni vek tih hre turin an ngen bawk.

Vaihlo zûk leh hmuam sim duh tan district hospital hrang hrangah Tobacco Cessation Clinic pan theih a ni.