KHAWTHLIR
Assam Minister-te nen inkâwm dawn
Assam cabinet minister pahnih - Atul Bora leh Ashok Singhal-te chu Mizoram leh Assam ramri buai chungchang Mizoram sorkar hotute sawipui turin vawiin hian Aizawlah an rawn zin dawn a, vawiin chawhma dar 11 hian Home minister Lalchamliana leh sorkar hotu dangte nen an inkâwm ang. Thu dawn danin, Assam minister-te hi Home Minister hoin a lo dawngsawng dawn a, inbiaknaah hian Land Revenue & Settlement minister Lalruatkima leh Home secretary Vanlalngaihsaka te pawh an tel dawn a ni.
Thisen pe
KṬP, Tuikual Branch chuan an branch diamond jubilee pualin nimin khan thisen pek an huaihawt a, Synod Hospital tan thisen unit 54 an pe a, petute mipa 45 leh hmeichhia pakua an ni. Tuikual Branch KṬP hi May 21, 1961-a din a ni a, member 866 an awm mek. ṬKP, Lunglei Ramthar Unit pawhin nimin khan Lunglei Civil Hospital-ah thisen unit 12 an pe a, petute mipa 10 leh hmeichhia pahnih an ni.
MP-in a fund thawh
Lok Sabha MP C Lalrosanga chuan Mizoram sorkarin Covid-19 a dona atan Chief Minister's Relief Fund for Covid-19 ah MP fund aṭangin Rs. 1,00,00,000 a thawh. C Lalrosanga hian sum hi nimin khan chief minister Zoramthanga hnenah a hlân a ni.
PC-in sorkar ngen
PC party chuan thuchhuah siamin, ramri vil uluk lehzual turin Mizoram sorkar an ngen a; ramri chungchanga inbiak a nih hunah Assam police-te'n dik lo taka Mizoram tana thil ṭha lo an tih ṭhinte tarlang zung zung thei tura inbuatsaihna ṭha nei reng turin sorkar an ngen bawk.
Endik rûnpui nei
IDSP hnuaia State Field Laboratory Unit chuan August 3, Thawhlehni khan Tlangnuam vengah swab sample endik rûnpui an nei a, mi 2,189 an endik zingah Covid-19 vei mi pakhat chiah hmuh chhuah a ni a, positivity rate hi 0.04% a ni.
Tuialhthei sem dan sawifiah
Kolasib DC Dr H Lalthlangliana chuan, Assam-ah NH-306 danchah a nih avanga district chhunga tuialhthei rualkhai zawka sem chhuah dan leh ramri chungchangah nimin khan Kolasib-a thuthar thehdarhtute a kâwm a; Covid-19 executive duty-te bakah, hna thawhna atana tuialhthei mamawhte'n rualkhai taka an dawn theih nan thlei bik awm loa sem mek a nih thu a sawi.