Mizoram-Assam minister-te an inbia Ramri-ah neutral force dah an remti Kawngpui dan tihtàwp thu sawi a ni lo
Mizoram leh Assam minister pahnih ve vete nimina Aijal Club-a inbia chuan state pahnih ramri-ah remna leh muanna a awm theih nan ramri-ah neutral force police dah belh leh state police dah belh loh an remti a, state police awm mekte hnuhkîr chungchang tarlan a ni lo thung. Assam state chhunga Mizoram luhka kawngpui dan tihtàwp lam thu sawi a awm lo.
Ramria remna leh muanna a awm theih dan tur sawi turin nimin khan Assam sorkara Border Protection and Development (BPD) minister Atul Bora, Urban Development minister Ashok Singhal leh BPD secretary GD Tripathi te Aizawlah an rawn zin a; Mizoram Home minister Lalchamliana, IPR minister Lalruatkima leh Home secretary Vanlalngaihsaka te nen Aijal Club-ah an inkâwm a ni.
Inkawm zawhah thuthar thehdarhtute an kâwm nghal a, joint statement an siam chu Assam BPD Secretary-in a chhiar chhuak. Statement-ah hian Atul Bora, Lalchamliana, GD Tripathi leh Vanlalngaihsaka ten hming an ziak a ni.
Joint statement-a a lan danin, state pahnih ramri leh a chhehvelah remna leh muanna a awm theih nan inbiakna hmanga hmalak dun leh a ṭul apianga hmalak an remti a; remna leh muanna vawn nun a nih theih nan sorkar laipui neutral force dah an remti a ni.
State pahnihte'n ramri hnaihah an police leh Forest mite tira patrolling ti tawh lo tur leh state police-te dah thar tawh lo turin an inrem a; chutih rualin, tuna police awm mekte chungchang tarlan a ni lo. Hemi chungchanga press mite zawhna an chhànnaah, ramria state police duty mekte chu hnuhkir tur a nih thu an sawi lo bawk.
Joint statement-ah hian Assam mite'n Mizoram pawhtu kawngpuite an danchah chungchang tarlan tel a ni lo. Press mite zawhna an chhànnaah pawh an sawi chiang lo a; Assam minister Atul Bora chuan, "Kawngpui danah hian Assam sorkar a inrawlh lo," a ti a, hei hi chhànna awm chhun a ni.
Atul Bora chuan zawhna a chhannaah, Mizoram leh Assam inkarah leh ramri velah remna leh muanna a awm theih nan bul an ṭan thar dawn thu sawiin, ramri dik tak chungchang chu an la ngaihtuah thlen loh thu a sawi a; thil kal tawh, state pahnih inkara thil thleng tawhte chu ngaihtuaha sawi zui an duh loh thu a sawi bawk.
Assam sorkarin an mite Mizorama zin lo tur leh fimkhur tura an chah chungchangah Atul Bora chuan, Assam sorkarin a ennawn tur thu a sawi.
Assam-Mizoram Joint Statement
1. Assam leh Mizoram sorkar chuan Ministry of Home Affairs (MHA), Assam leh Mizoram chief minister-te'n ram inrina vela boruak sosang tireh tur leh inbiakna hmanga a chinfel tuma hma an laknate lawmawm kan ti a, kan pawmpui.
2. July 26, 2021-a thite (inkahnaa Assam police thite) Mizoram sorkar aiawhte'n pawi an tih thu leh hliamte dam thuai tura an duhsak thu an sawi.
3. State pahnihte chuan ramri leh a chhehvelah remna leh muanna vawn nun kan remti a, chumi atana sorkar laipui neutral force dah kan remti. Heta tan hian state pahnihte'n an police leh forest mite an awmtir lo ang a, patrolling an ti lo ang a, state police an dah thar tawh lo ang. Hei hian Assam-a Karimganj, Hailakandi leh Cachar district te, Mizorama Mamit leh Kolasib district-te a huam.
4. Ramri leh a chhehvelah remna leh muanna vawn nun leh kenkawh a nih theih nan Assam leh Mizoram sorkar chuan a ṭul apianga hmalak kan remti a ni.