COVID-19: Mizoram dinhmun Hripui vei 1,088 hmuh belh a ni

August 4, Nilaini khan Mizoramah Covid-19 vei mi 1,088 hmuh chhuah a ni a, August thla ni li chhungin mi 3,158 hmuh chhuah a ni tawh. Nimin khan hripui laka fihlim tawh mi 438 chhuahtir an ni a, hripui vangin mi pakhat a thi.

Covid-19 vei hmuh tharte chu mipa 530 leh hmeichhia 558 an ni a; ZMC laboratory-a hmuh chhuah 552, TrueNAT-PCR hmanga hmuh 28 leh Rapid Antigen Test hmanga hmuh 508 an ni. Nimin zinga result tihchhuah hnuah enkawl mek mi 13,065 an awm a, an tam lai ber a ni.

Hripui vei hmuh thar mi 1,088-te chu symptom nei 314 leh nei lo 774 an ni a; tualchhunga kái 1,070 leh tun hnaia state pawn aṭanga rawn lut mi 18 niin, tualchhunga kái zingah kàina chin hriat loh mi 372 an awm.

IDSP record angin, Mizoramah Covid-19 vei mi 42,083 hmuh chhuah a ni tawh a, mipa 22,059 leh hmeichhia 20,024 an ni. Nimin tlai dar 5 thleng khan mi 29,299 (69.62%) chhuahtir an ni tawh a, mi 158 (0.38%) thi tawhin, enkawl mek mi 12,626 (30.00%) an awm.

August 4, Nilainia swab sample endik dan chu - ZMC laboratory-ah Aizawl leh Serchhip district-a mi 2,265, TrueNAT hmangin district 10-ah 346 leh RAT hmangin district 11-ah 6,447 a ni a, a vaiin sample 9,058 niin, hripui vei hmuh chhuah 1,088 chu 12.01% a tling. Positive percentage hi ZMC-ah 24.37%, TrueNAT-ah 8.09% leh RAT-ah 7.87% a ni.

Covid-19 positive hmuh chhuah zat hi Aizawl district-ah mi 900, Kolasib district-ah 53, Lawngtlai district-ah 44, Lunglei district 43, Mamit district-ah 22, Siaha district-ah 17, Saitual district-ah panga, Champhai district-ah pahnih leh, Serchhip leh Khawzawl district-ah mi pakhat ve ve an ni. Aizawla veng 69 leh khaw dang 31-a mite an ni a; Lawngtlaia veng 10, Kolasib-a veng pakua leh Lungleia veng pariat a lang.

Hripui vei hmuh thar mi 1,088 zingah nausen kum khat tling lo paruk an tel a; kum 90 chung lam pathum telin, a upa ber chu kum 98 mi a ni.

August thla ni li chhungin Mizoramah Covid-19 vei mi 3,158 hmuh chhuah a ni tawh a, chawhrualin ni tin mi 789.5 hmuh chhuah an awm ang a ni. Mizorama Covid-19 vei hmuh tawh zat 42,083 chu kum 2011 chhiarpui angin, Mizorama mi 1,000 zelah hripui vei mi 38 an awm ang a ni.

Nimin khan tlai dar 5 thlengin hripui laka fihlim tawh mi 438 chhuahtir an ni a; Aizawl district-ah mi 303, Kolasib district-ah 50, Mamit district-ah 42, Champhai district-ah 14, Lawngtlai district-ah 11, Siaha district-ah pakua, Serchhip district-ah panga, Saitual district-ah pathum leh Lunglei district-ah pakhat an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 11,506 hmuh chhuah a ni tawh a, TrueNAT-PCR hmangin 2,499, RAT hmangin 28,077 leh Guwahati-ah pakhat hmuh chhuah a ni tawh.

IDSP tarlan danin, August 4, 2021 thlengin Mizoramah swab sample 6,62,277 endik a ni tawh a, chu'ng aṭanga Covid-19 vei hmuh tawh zat 42,083 chu 6.35% a ni. Hripui vei hmuh tawh zinga mi 37,842 chu Mizoram chhunga kái chhâwng an ni a, mi 4,241 chu Mizoram páwn aṭanga an rawn luh hnua hmuh chhuah an ni.