Lungleia RT-PCR Lab. din tumah lawm Lab. din dodaltute a tàwp thlenga do tum

RT-PCR Lab. for Chhimbial chuan thuchhuah siamin, Gauhati High Court-in Lungleia RT-PCR laboratory din tura Mizoram sorkar a hriattir chu lawmawm an tih thu an tarlang a; Lungleia laboratory din tur dodaltu leh High Court thutlukna tihkhawtlai tuma beitute chu ti tawh lo tura chahin, an dodal zel tur thu an tarlang bawk.

RT-PCR Lab for Chhimbial chuan, "Chhimbial mipuite'n RT-PCR lab. kan neih theihna tura Gauhati High Court-in PIL a ngaihtuah tâka thutlukna August 4, 2021-a a siam ta hi lawmawm kan ti hle a ni," an ti a; High Court-in Mizoram sorkar a hriattirnate leh tih nghal tura a tihte chu lawmawm an tih thu an sawi a ni.

High Court thutlukna anga RT-PCR lab. dinna tur ngaihtuahtu committee-a tel turin YMA Sub-Headquarters, Lunglei president Lalrotluanga leh Lunglei Ṭhalai Pawl chief organiser Lalduhawma Pachuau-te ruat nghal an ni tih sawiin, lawmawm an tih thu an sawi.

RT-PCR Lab for Chhimbial chuan, PIL an thehluhnaa anmahni puitu, sum phût loa High Court-a dinsaktu JC Lalnunsanga leh a thawhpuite chungah an lawm tih an sawi a; chhim bial mipui leh hmun hrang hranga ṭawngṭaipuitute leh vehbûr an khawna sum thawhtute chungah an lawm tak zet tih an sawi bawk.

Hetih lai hian, an hmalakna tihṭhuanawp tuma ṭan khawh tlat an awm nia sawiin an dem thu an sawi a, "High Court lama kan ṭanhmun a pheh theih nan leh hmalakna dodâl záwnga che ṭhin an awm hi pawi kan ti tak zet. Lab. din a nih theih nana hmalakna dodal leh tikhawtlai zawnga hma la tawh lo turin kan ngenin kan hriattir a, chhim bial mipuite’n RTPCR lab. kan neih theihna tur tiṭhuanawp zawnga che leh an awm a nih chuan a tàwp thlengin kan dodal zel dawn a ni," an ti.