Tripura aṭangin gas a lo thleng

Nimin khan Tripura aṭangin MIZOFED lirthei hmangin eirawngbawlna gas phurh luh ṭan a ni. LPG hi Bishalgarh Bottling Plant, Tripura aṭanga lak a ni a, a rawn thleng hmasa hi truck pali niin, gas bûr 1,224 an phur a ni.

Gas phurh luhte chu MIZOFED-ah truck phur hnih, Zothan Indane Gas Agecy leh Biakkungi Gas Agency-ah truck phur khat ve ve insem tura ruahman a ni a; kawng laka la thang mek truck pakhat thleng leh tur chu Suakchhunga Gas Agency-in a chang thung ang.

Nimin vêk khan Mizoram Police Gas Agency, M&B Indane Gas Agency, Khatla leh Southern Gas Service, Lunglei truck-te chuan Bishalgarh Bottling Plant, Tripura an pan bawk.

Nimina gas phur lirthei rawn thlengte chu Food, Civil Supplies & Consumer Affairs director Ramdinliani, MIZOFED chairman K Laldawngliana leh sorkar official dangte'n Ṭhuampuia AMC pisa kawtah an lo dawngsawng a ni.