Silai keng mi 4-in Bungṭhuam tlangval an suam

August 4, Nilaini chaw­hma dar 10:30 vel khan Lalmuanawma Ralte s/o R Lalrintluanga, Bungṭhuam, Mamit district chu Kanhmun khuaa a kalnaah Bru hel nia rinte'n suamin, Rs. 28,450 an chhuhsak nia sawi a ni. He thil thleng hi YMA leh pawl dangte'n an dem thu leh pawi khawihtute man ngei an phût thu an tarlang.

Bungṭhuam Branch YMA-in nimina press release an chhuaha an tarlan danin, Lalmuanawma Ralte chu August 4, Nilaini chawhma dar 10:30 - 11:00 inkar vela Kanhmuna dawr bungrua la tura Bolero hmanga a kal chu Bungṭhuam leh Luimawi inkar, Goboi lei thlen hma deuhah hmai tuam pali, Mizo ṭawng pai, silai kengte'n an tiding a, Rs. 28,450 an chhuhsak a ni.

Mizoram chhunga insuam­na a thleng chu an dem thu tarlangin Bungṭhuam YMA chuan, "Thil sual titute hi Mizo­ram sorkar leh police-in chhui chhuakin, hrem ngei se tih hi kan phut a ni," an ti a; pawi khawihtute zawn kawngah thuneitute thawhpui an inhuam reng thu an sawi.

MSU sub-headquarters, Bungṭhuam chuan thuchhuah siamin, "Kan ram chhung ngeiah hetiang inrîkrâpna a thleng hi a him loin, Mizo hnam nihna ang pawhin a tlàwm thlâk hleah kan ngai," an ti a; pawi khawihtute chu chhui chhuak ngei tura Mizoram police an phût thu an tarlang.

Hachhek Constituency Development Committee (HCDC) pawhin thuchhuah siamin, Lalmuanawma Ralte chunga thil thleng chu an dem thu an tarlang a, "Misualte chhui chhuak a, an phu tâwka hrem ngei turin Mizoram sorkar kan phût a ni," an ti.

HCDC chuan, Hachhek bial chu hnam hrang hrang awm tamna, Tripura leh Assam nena inrî a nih avangin inlungrual taka awm an duh ber tih sawiin, "Kan inlungrualna tichhe záwnga chê an awm leh ṭhin hi pawi kan ti tak zet. Hetianga che ṭhinte chungah hian eng pawh thleng se, anmahni cho chhuahah kan ngai a ni," an ti a; misualte zawn chhuah kawngah police thawhpui an inhuam thu leh anni pawhin a ṭul dan dana zawn ve reng an tum thu an sawi bawk.