Sumdawngte'n ngaihhnathiamna pek phût
Zoram Entrepreneurs & Traders Association (ZETA) chuan thuchhuah siamin, lockdown avangin harsatna lian tak an tâwk mek tih an tarlang a; sumdawnnaa electric bill leh tui bill ngaihnathiam te, bank loan, chhiah leh thil dang ṭhenkhatah ngaihhnathiamna siamte an phût.
ZETA hian Mizoram sorkarah ngenna chi hrang hrang an siam a; an ngennate chu Mizoram sorkarin a tihlawhtling thei lo a nih a, lockdown kalpui leh a nih dawn chuan sumdawngte tan chawi belha kal ngaihna a awm tawh loh avangin, sorkarah thil phut chi hrang hrang an nei tih tarlangin, "Kan ngennate min tihhlawhtlinsak lo a nih chuan MHA Guidelines zûlzuiin kan theih ang angin legal proceedings kan kalpui dawn a ni," an ti.
ZETA chuan, Covid-19 hripui lèn tirh aṭanga sorkarin lockdown a puan avangin thla 16 vel chhung sumdawnna kalpui mumal theih a ni lo tih sawiin, "Sumdawngte'n nasa takin harsatna kan tâwk a, sum lak luh awm mumal loin dâwr luah man, thawktute hlawh, bank interest leh bill neuh neuh kan chawi thlâwn reng a ni," an ti a; hripui do tlân a ngai tih an hriat avangin sorkar ruahmannate chu sawisel loin an tuar ngawt ngawt tih an tarlang.
India ram leh khawvel ram dangah pawh sumdawnna leh hnathawhna hmun khàrkhip rei lutuk chu economy tan a him lo tih an hriat avangin rei tak tak inkhàrkhip loin, sumdawnna leh hnathawhnate fimkhur tak chunga kalpui dan tur sorkarin an ruahman ṭhin tih sawiin ZETA chuan, "Kan sorkar pawhin sumdawnna leh hnathawhna hmunte khàrkhip tawh lo a, fimkhur taka kalpui dan tur ngaihtuah turin kan ngen a ni," an ti.
